DILI pa lang dugay, gipahibalo ni appointed south district Councilor Erik Miguel Espina nga kutob na lang siyang molingkod sa Konseho karong buwana. Inig Enero mo-resign na siya isip konsehal. Kini aron paghatag og dalan sa pag-asumir pagbalik ni Konsehal James Anthony Cuenco. Si Espina, kinsa usa ka TV broadcaster ug columnist, natudlo isip konsehal niadtong Hulyo, hulip kang Cuenco human gi- dismiss ang na-ulahi sa Ombudsman.
Ang dismissal ni Cuenco gumikan sa iyang kalambigitan sa matod pa kuwestiyonableng pagpamalit og mga medisina gikan sa pork barrel sa iyang amahan nga si kanhi south district congressman Antonio Cuenco. Apan ang sabot sila ni Espina ug Cuenco nga kon ma-clear si Cuenco sa kaso, mobalik siya sa Konseho. Ug kay ang dismissal ni Cuenco sa Ombudsman gibaliktad man sa Court of Appeals, mao nga mobalik siya sa Konseho karong Enero. Iyang tiwason ang nahibiling buwan sa termino. Akong gidayeg si Espina gumikan kay mituman gyud siya sa ilang kasabutan ni Cuenco.
Apan ang wa nako masabti, nganong dili naman mopadayon si Espina sa iyang tinguha nga molansar sa pagka-konsehal sa south district ubos sa Barug PDP Laban? Wala kini sa kasabutan. Di na pod makadagan si James kay wala siya maka-file sa iyang certificate of candidacy ug dili na puwede ang substitution. Puwedeng pulihan ni James ang iyang amahan sa lineup sa Barug. Apan simbako kon adunay mahitabo ni Tony sa nagsingabot ang eleksiyon, anha ra maka-substitute si James. Unsay kahay gikaluoran ni Espina? Karong bag-o, miingon na pod siya nga iyang huna-hunaon kon molansar na siya o dili. Unsa man ni laban o bawi?
Reaksiyon
Ania kitay nadawat nga reaksiyon kabahin niining isyo ni Espina. Gikan ni Lanivo Osorio: “Hi, Super Bob, I totally agree with your characterization of the Hon. Espina as a ‘true gentleman’ for keeping his informal agreement with the Hon. James Cuenco regarding the seat they occupied in the city council. I could only wish we have more of the likes of Erik in Cebu politics. Pero ang uban gani diha mo-paugat pa man para dili lang matangtang sa katungdanan. To borrow your popular expression, if I may, Pagkatoytoy!” (bobbygnalzaro@gmail.com)