SUPERBALITA CAGAYAN DE ORO

Todino: Magtanom og kahoy aron anihon sa illegal logger?

Pro Bono

KON mahimong balaod kining House Bill 8728, obligado na unya nga motanum ang mga graduating students og kahoy.

Mandoan sila, isip kabahin sa requirement pag-gradwar ang pagtanom og 10 ka mga kahoy.

Basi sa balaodnon, itanom unya ang mga kahoy sa forest land, mangrove, protected area, ancestral domain, civil o military reservation ug ngadto sa abandonadong mga minahan.

May balaod o wala, mahimo kining ipatuman sa matag tunghaan ang pagtanom og kahoy isip kabahin sa community service sa mga tinun-an.

Salikwaot kaayo kining balaodnona. Gawas pa dili na kinahanglanon. Ang ubang eskwelahan duna nay programa sa pagpananom og kahoy.

Gipatuman na usab kining programaha sa ubang mga local government unit. Duna say mga non-profit organization nga kanunay nagboluntaryo sa pagpananom.

Ang gusto nato himoon sa atong mga magbabalaod mao nga ipatuman nila sa hingpit kining balaod batok sa illegal logging. Kay hangtod ra ba karon, misiaw pag-ayo kining mga illegal loggers.

Bisan magtanom pa og minilyon ka mga kahoy ang mga estudyanti kon magpadayon kining illegal logging sa bisan asang dapit sa nasod kawang lamang tanan ang paningkamot.

Unsa bay tuyo sa atong mga magbabalaod, patamnon ang mga tinun-an og kahoy aron anihon sa mga illegal loggers?

Siyaro wa gyud makamatikod kining mga opisyal nato, labi na kining mga magbabalod. Susiha ra gud inyong palibot panahon sa ting-ulan. Unsa man, dunay baha o wala.

Kon wala pa unta maupaw atong kabukiran dili mahitabo kining mga pagbaha. Pero, kon imong susihon ang danyos nga gibilin sa mga illegal loggers, makurat ka sa ilang pagpanglugos sa atong kakahoyan.

Mao unta ni angay tutokan sa gobiyerno. Nakataya diha ang kaugmaon sa tanan. Kay kon maupaw na gyud sa hingpit atong palibot seguradong wa na tay laing kapaingnan gawas sa pag-antos sa atong pagpabaya.

Ayaw nalang na please ipalusot ang balaod. Pagduso nalang og balaod nga mopalig-on sa kampaniya batok sa illegal logging. Pwede ba. Kadtong mamutol og kahoy putlan pud sa ilang kuan.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph