GIINGONG wala pa makabayad sa ilang Real Property Tax ngadto sa Provincial Treasurer’s Office ang Misamis Oriental Rural Electrification Service Cooperative 1 (Moresco-1, Laguindingan) ug Moresco-II sa lungsod sa Medina nga mokabat na sa milyon-milyon ka pesos.
Kini ang pahayag ni Provincial Treasurer Ronald Violon nga ang pamunuan sa duha ka electric provider nipaabot na nga mobayad human giingong nahigmata nga dili sila exempted sa pagbayad sa buluhisan.
Kini sukwahi sa gipasiatab sa National Electrification Administration nga kooperatiba sila ug dili na angayan mobayad sa buwis.
Apan gipasabot ni Violon nga base sa Akta Republika 7160 kon Local Government Code of 1991 Section 3, kadto lamang kooperatiba nga naka-rehistro ug accredited sa Cooperative Development Authority (CDA) ang exempted pagbayad sa buwis.
Ang Moresco 1 ug 2, pulos dili rehistrado sa CDA. Kini ang hinungdan gilakag kini sa Provincial Treasury.
Sa kasamtangan moabot sa P54, 560, 575 ang buhis nga angay bayaran sa Moresco 1, samtang mokabat sa P58,324,981.26 usab sa Moresco 2.
Gipasabot ni Violon nga adunay duha ka paagi dili madak-an ang Moresco 1 ug 2 ug mao kining pag-avail og compromise agreement ug tax relief. (SVB)