Binghay: Natunaw sa ka-uwaw

NATUNAW ko sa ka-uwaw dihang titulo ra akong nahinumduman sa gi-apilang lumba sa diskurso, 9-anyos pa akong pangidaron. Hapit kuyapi akong magtutudlo kay nahimo naman hinuon kong kataw-anan.

Tungod ini nga kasinatian, nakapanaad ko nga buntugon nako akong pagka-manggi-uwawon ug kahadlok sa intamblado.

Nagsugod ko og bansay-bansay, sunod-sunod sa akong mga idolo ug paboritong mga magsisibya sa radyo ug telebisyon hangtod nga nahimo kong maestra, magsisibya, ug reporter sa edad nga 23.

Gawas ini, nagtudlo sab ko og Speech Communication sa usa ka eskwelahan sa insik ug unibersidad nga gidumala sa gobierno sa Sugbo aron makatabang ko niadtong mga tinun-an nga hangtod karon mahadlukon ug manggi-uwawon mo-atubang sa publiko.

Nahimuot ko kay karon gilupig naman hinuon ko sa akong mga tinun-an nga mas maayo pa mo diskurso ug malampuson na sa ilang mga kurso pagka abogado, maestra, politiko ug komentarista.

Aron mapadayon, dia koy ipa-ambit nga lindog nga makatabang pagpahanas sa diskurso ug pakig-atubang sa daghang tawo:

Una, aron mawala ang uwaw, magbansay-bansay sa idiskurso atubangan sa samin aron makita ug madungog ang kaugalingon. Obserbahi imong sinultihan, facial expression, gikusgon sa tuno ug tingog. Tangtanga ang naandang manirismo samtang nagdiskurso (pagkalot sa ulo, sayaw-sayaw samtang mag-estorya).

Obserbahi sab ang gipaspason sa isulti kay kon subra ra ka paspas o hinay, mura na hinuon og gigukod unya kan-on na ang mga pulong nga gisulti maong di na masabtan.

Paninguhaa nga di magbalik-balik ang mga pulong nga imong gigamit aron di puol ug apili og mga pasi-aw aron makapakatawa ug mawala ang nerbiyos.

Limiti sa 5 ka punto ang imong idiskurso. Ayaw palabi-i og daghan kay di na masabtan ug mahinumduman.

Likayi pagtan-awa ang mga hinawayon aron di ka maluya. Hinuon adto tan-aw sa nakasabot ug nahimuot sa imong pasi-aw.

Katapusan, ayaw kauwaw pagpangayo og tabang sa mga ngilngig ug nag-unang mga professional og himoa silang inspirasyon.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph