LIBOAN ka mga runner ang gipaabot nga mosalmot sa dakong lumba sa dagan nga gitawag og “2nd Cebu Rotary Run District 3860” nga idalit sa Rotary Club of Cebu nga dumalahon sa Rotary Club Banilad Metro ug Rotary Club Cebu West karong Pebrero 21, 29 sa alas 5:30 sa buntag sa SM City north parking area, dakbayan sa Sugbo.Sa press conference kagahapon sa Parklane Hotel, si Kenneth Casquejo, ang chairman sa nahisgutang lumba sa dagan, niingon nga kini maoy kick-off lamang sa tinuig nilang rotary week matag katapusang semana sa Pebrero.
Adunay 15-k men/women diin ang kampiyon makabulsa sa P8,000; sa 7-k men/women kampiyon makadawat og P5,000; ang 4th ngadto’s 10th place adunay madawat nga consolation prizes.
Anaa usab ang 3-k fun run boys/girls, 200m kiddie dash sa nag-edad og 7 anyos paubos ug ang 400m kiddie dash sa nag-edad og 8 ngadto’s 12 anyos nga may madawat nga cash og medals.
Kompirmado’ng modagan ang perennial winner nga gikan sa Kenya nga si Simon Losiaboi ug Cebu based Grace Delos Santos.
Adunay pahalipay nga madawat ang mosalmot nga mapiling best in costume, running couple, running family, oldest ug youngest runner, ingon man ang biggest delegation.
Ang registration fee nagkantidad og P150 libre na ang singlet, race bib ug snacks. Magpalista lang sa Phil. Sports Commission office sa Cebu City Sports Center o mahimong motawag sa 0922-8650402 (Kenneth) ug 0917-8193669 (Jet Neric). Ang deadline pagpanglista kutob lang sa Pebrero 19. (DQG)