SA katuyoan nga kahatagan og igong kahapsay ang negusyo sa transportasyon sa kadalanan nga adunay katungdanan ang gobyerno sa pagdepensa sa interes sa “riding public”, tuyo nga namugna ang buhatan sa Land Transportation Franchising and Regulatory Board (LTFRB).

Apan imbis kalinaw ug kahapsay ang mopatigbabaw ning maong industriya, ning bag-o, miulbo ang dakong kagubot sa rehiyunal nga buhatan ning maong ahensya dinhi sa Sugbo human ang mismo presidente sa MACTOA (Metro Cebu Taxi Operators Association) Richard Cabucos uban sa iyang mga opisyal sa kapunongan, ang mi-expose sa Tulumanong Alagad sa DYRF Radyo Fuerza, 1215 Khz AM sa ilang reklamo batok sa kasamtangang Regional Director nga si Romulo Bernandez, sa mosunod nga mga pasangil: (1) pagpangayo og P110,000 nga budget alang sa pagbaligya matag prankisa samtang P10,000 lamang ang resibuhan nga mosulod sa kaban sa gobyerno; (2) minamao-mao nga RMC (Route Measurement Capacity) Study ni DOTC Undersecretary Anali Luntoc nga walay tinud-anayng gipahigayon nga pagtuon ug kunsultasyon unya gideretso na ang paghapin niini nga maoy basehan sa pagpanghatag og dugang prankisa sa taxi dinhi sa Sugbo; (3) automatic nga pagdeklarar nga abandonado na ang prankisa nga unta nakabayad na man sa penalty ang hingtungdan; (4) dili paghatag og notisya, kay ang kahatagan og kasayuran mao da man ang mga operator nga duol sa iyang dughan.

Click here for stories and updates on the Sinulog 2010 Festival.

Miduyog usab ning maong reklamo ang mga bus operator sa ilang kahingawa nganong ang mga prankisa sa mga unit sa Ceres Liner sa dihang nakadumbol, nagbiyahian man og Guadalupe Carbon.

Pun-an pa sa susamang body number apan managlahi ang plate numbers ug rotang gidaganan. Ang nakaparat kay ipasa man sa direktor sa LTFRB ang ilang reklamo ngadto sa LTO unya inigdagan nila sa LTO ipasa na usab sila sa ahensyang una nilang gidangpan. Unsa may anaa ning maong kompaniya nga untouchable?

Ang gahom sa regulasyon pinasubay sa “police power of the state” diin giprotihian ang interes sa mga operator, driver ug sa mga sumasakay. Ning maong kalandrakas, angay tingaling momata na ang ulohang buhatan sa Department of Transportation and Communications (DOTC) nga ang regulasyon nga maoy ilang trabaho mao na man mismo’y naghatag og di mabangbang nga pamurhisyo. Kon mao ni magpadayon, maayo tingaling ang serbisyo ning maong ahensya sentinsyahan nas katawhan nga paundangon.

GADANGHAG NGA OMBUDSMAN

Samtang mainiton nga mipasalig si Assistant Ombudsman Virgie Santiago nga ilang ipadali ang pagpasubay sa kasong napasaka sa Metro Cebu Taxi Operators Association (MACTOA). Apan ang nakaporke kay mismong buhatan sa Ombudsman ang mikumpisal nga nawagtang na ang kasong gipasaka batok kang Bernaldez ug sa iyang mga ginsakpan sa LTFRB pinetsahan og Oktubre 21, 2008 ug gitatakan og received sa ilang opisina pagka Oktubre 24, 2008.

Kon mismong file sa kaso ang mangahanaw diha sa buhatan sa Visayas Ombudsman, dili na angay pang ikahibulong sa katawhan kon nganong wa gyuy pag-irog ang nasang-at nga mga kaso.

Kay kuyaw kon ang mga dokumento naapil na sa sentensya sa pansayan sa gadanghag nga Ombudsman.