NAGBAHIS si Senador Jamby Madrigal sa unang debate sa mga kandidato sa pagkapresidente nga gipasiugdahan sa Philippine Daily Inquirer.

Matag pangutana, piti-piti si Senador Manny Villar. Gibirahan siya sa iyang giingong pagkalambigit sa C-5 highway extension, nagbaha nga TV ads ug uban pa.

Click here for stories and updates on the Sinulog 2010 Festival.

Pero nauknol si Senador Jamby sa dihang gipangutana kon nakahibawo ba siya sa presyo sa galunggong (isda nga tuloy) ug itlog maalat. Layo kaayo ang iyang tubag apan nakalusot kay matod pa niya usa siya ka vegetarian ug di mokaon og isda.

***

Ang isdang tuloy mas minos man og presyo kon ikomparar sa tangigi, pugapo, pandawan ug molmol.

Kining maong isda maoy gigamit ni kanhi presidente Cory Aquino sa iyang pag-atake ni kanhi diktador Ferdinand Marcos kay matod pa niya bisan ang mga kabos di na makapalit sa labing baratong matang sa isda.

Ang nindot unta nga human mangatarungan si Senador Jamby nga vegetarian diay siya, gipangutana unta siya kon unsa ang mga utanon nga gihisgutan sa kanta nga Bahay Kubo. Ang kuyaw kon mangatarungan na sab siya nga di siya singer.

***

Hilabihan ka-suwerte sa mga estudyante nga mogradwar sa mga public high school dinhi sa dakbayan sa Sugbo karong Marso.

Makabenepisyo sila sa kalumo sa kasingkasing ni Mayor Tommy Osmeña nga manghatag kanilag tag P10,000 kon moeskuyla sila sa kolehiyo. Kadtong gikan sa mga bukirang barangay, P20,000 ang madawat.

Pero di cash ang ilang madawat kay ang hinabang ni Mayor Osmeña idiritso man sa ilang eskuylahan nga kolehiyo.

***

Nindot gyud ning tuig sa eleksyon. Unang nakapahimulos sa kamaayo ni Mayor Osmena ang mga senior citizen nga nanagpakadawat og P2,000 nga pinaskuhan ug P2,000 nga inadlawan.

Karon, gisunod ang mga mogradwar sa mga publikong high school dinhi sa syudad sa Sugbo. Daghang malipay niini apan naputos ang mayor sa mga pagsaway gikan sa iyang mga kaatbang sa pulitika, labi na ni magpapatigayon Atan Guardo.

Pasagdi na lang ang mayor basta daghang malipay sa iyang gibuhat, bisag klarong pamulitika ang iyang gibuhat.

***

Asa kaha kutob ang kaayong gipakita ni Mayor Osmena? Giuna niya ang mga tawo apan gilihay-lihayan lang una ang mga libaong sa kadalanan sa dakbayan. Gipasiatab niya ang dakbayan sa Sugbo nga mahimong second to none. Tinuod na kon libaong maoy hisgutan.

***

Gilusad ni Mayor Osmeña ang kampanya sa pagpanangtang sa mga poster sa mga pulitiko nga gibutang sa gawas sa designated posters area. Ipatangtang sa mayor ang illegal poster ni bisan kinsang pulitiko bisan pa kon iya kini sa iyang mga alyado sa Bando Osmeña-Pundok Kauswagan (BO-PK).

Gusto sa mayor nga di magwakat ang mga poster dinhi sa syudad, ilabi na siya wa magpahimog poster sa iyang kaugalingon.