UBAY-UBAY na pod kita nagkauban, mga higala, pinaagi sa matag-pahina niining Super B nga naghatag kanato'g dalan aron hisgutan ug tun-an ang lakat sa atong kapalaran. All for God's glory ang atong gininhawa, kusog, hagit, pinilong grasya ug tsansa nga makapahiyom pa kita busa dili nato usikan kini, higala.
Daghan ang interesado sa New Year's resolution, migo, kay lagi nindot nga adunay kausaban ang atong kinabuhi nga kaayohan ang paingnan. Ang tuba nga usa ka timba ang mahurot sa matag-adlaw; karon usa ka galon na lang.
Ugma puhon, usa ka baso na lamang ang atong tumbahon kay lagi himsog nga panglawas atong paninguhaon.
Sa pinansiyal nga bahin, pugongpugong gayud gamay, mga darling, kay tinghubas baya sa panudlanan ang bulan sa Enero kay dako'g gasto sa Pasko ug Bag-ong Tuig, migo, hu hu hu!
Kung hawak ang hisgutan, "pagamay" gayud ang mas angay kay kung molapad pa mura na gayud og sumpay sa Great Wall of China. Bitaw, daw nakatulon ko'g watermelon sa kabutod sa akong tiyan og kinaon. Left and right man god ang imbitasyon busa "fights," igsuon.
Tungod hapit na ang Enero, adunay daghang plano sa pagtuon ug bakasyon ang mga titser ug estudyante karon.
Hangyo lang nga dili nato dalion kay dili man "racing" ang education. Maminaw ug magpartisipar kita, ha?
Sa labaw'ng importante, andam na ba kaha ang mga "kalag" nato, mare, sa mga huyop sa hangin nga atong masinatian? Sa tinuod lang, walay ni usa kanato nga adunay kontrol o pagbuot sa kinabuhi kon di ang Diyos lamang. Atong higayonan ang sinserong pag-ampo, igsuon, kay mao kini makapalahutay kanato luyo sa mga kusokuso sa kinabuhi.
Usahay man god, grabe kaayo kita makapangandam sa umaabot, unya makalimtan nato ang mga ginagmay apan nindot nga butang nga dili matupngan sa imong kuwarta bisan nagbaha lang.
Akong pag-awhag kaninyo ang pagpili sa malinawon ug simpleng pagpamuyo karong umaabot nga 2019 aron likay sa stress, mga darling. Magpasalamat kita sa grasyang naharvat (dawat god) ug sa wala nato kay si Lord na ang bahala sa tanan niana. #advancehappynewyear!