COTABATO CITY -- Hugtanon nga gibantayan karon sa militar ang mga terorista sa Central Mindanao.
Gibutyag mismo ni Army's 6th Infantry (Kampilan) Division spokesman, Major Arvin Encinas nga gikompirma mismo sa duha ka miyembro sa Dawlah Islamiyah Terrorist nga misurender ngadto kang Cotabato City Mayor Cynthia Guiani Sayadi nga dunay mga kauban pa sila nga nagkatag sa Central Mindanao.
Target niini nga molusad og katag-katag nga pagpamomba sa Mindanao ilabi na sa mga inilang siyudad.
Gawas sa Dawlah Islamiyah, gipanid-an sab sa militar ug kapulisan ang grupo ni Shiek Esmail Abdulmalik, alyas Kumander Abu Toraife sa Bangsamoro Islamic Freedom Fighters (BIFF), Maute Terror Group ug Ansa'r Kilafah Philippines (AKP).
Ang duha ka terorista nga gisurender sa ilang mga ginikanan ngadto kang Mayor Sayadi giingong gibansay sa paggama og improvised explosive device (IED) lakip na ang direkta nga pagpamomba.
Nakig-alayon sab ang mga dautang pundok sa Islamic State of Iraq and Syria (ISIS) ug Jemmaah Islamiyah Terrorist.
Ang uban nga mga terorista susama sa grupo ni Shiek Esmail Abdulmalik nagtago-tago karon sa mga hilit nga dapit sa SPMS box ug Liguasan Delta sa probinsiya sa Maguindanao.
Gitahasan mismo ni 6th ID Chief Major General Cirilito Sobejana ang iyang mga ginsakpan nga magpatuman og hugtanon nga seguridad ilabi na sa pagsugat sa Bag-ong Tuig.