ADUNAY mga tag-as nga opisyal sa gobyerno sa Sugbo ang giingong nalambigit sa ilegal nga drugas, kini ang gitug-an ni Eduardo Año, kalihim sa Department of Interior and Local Government (DILG).
Sa iyang listahan sa mga narco politicians, adunay 77 ka mga pangalan nga nag langkob sa mga mayor, bise gobernador, congressmen, ug mga municipal councilors diin kasagaran niini magpapili sa nagsingabot nga midterm election sa Mayo 2019.
Ang hepe sa Cebu Provincial Police Office Senior Superintendent Manuel Abrugena miangkon nga aduna siya’y nadawat nga impormasyon may kalabotan sa kalambigitan sa mga opisyal sa gobyerno nga protector sa mga durugista.
Apan iyang giklaro nga wala pa kini ma validate sanglit ang ilang buhatan nagpadayon pa sa ilang gihimo nga validation ug case build-up.
“May mga raw information na ever since naman na bago ako naging provincial director dito sa Cebu may naririnig na po akung mga pangalan, however, ang nasabi ko nga po hanggat wala po kaming matibay na ebedensya,” matod ni Abrugena.
Mipasabot si Abrugena nga adunay lig-ong basehanan si DILG Secretary Eduardo Año sa pagtumbok nga adunay mga politiko sa Sugbo nga nalambigit sa illegal nga drugas, sanglit ang kalihim kanhi pangulo sa intelligence sa armadong kusog sa nasud.
Makig-alayon ang kapulisan sa probinsya inabagan sa Police Regional Office-Central Visayas sa DILG ug sa Philippine Drug Enforcement Agency-Central Visayas alang sa pag-monitor niining mga politiko nga magpapili sa nagsingabot nga eleksyon.
“Kaya po ang tinutukan natin ngayon is yung ma control po natin yung firearms at saka yung drugs kasi nagamit na po ito ng mga unscrupulous politicians sa pag kandidato po nila,” dugang ni Abrugena.
Usa kini ka hagit sa kapulisan matod ni Abrugena ning umaabot nga piniliay tungod sa posibling pagkatap sa kwarta gikan sa ilegal nga drugas.
Sa pagkakaron, aduna silay nahibaw-an nga kandidato apan dili pa kini nila mahinganlan tungod sa nagpadayon nga case build-up. (AYB/Superbalita Cebu)