NIADTONG Pasko, wa mi trabaho. Mao ni ang naandan sa Sun.Star basta December 24 ug 25, papahuwayon ming tanan sa kompaniya, except sa among digital staff nga magbutang og skeletal personnel aron mo-handle sa among web.
Human nako mahatod ang akong asawa sa GMA 7, nipauli ko sa balay aron mokaon daan. Human nakog kaon, nag-ilis ko ug una nakong giduaw ang lubong sa akong anak nga si Mary Heart. Human nakog butang sa mga buwak, kandila ug mubo nga pag-ampo, nilakaw dayon ko.
Wa koy plano nga mosaka sa Brgy. Busay, apan kay tan-aw nako igo pa ang oras, nipadayon ko. Apan paglapas nako sa Marco Polo ug sa barangay hall, nahibung ko nga taas man ang kutay sa mga sakyanan. Mao diay, dunay bangga.
Usa ka motorsiklo ang nabangga sa usa ka blue nga awto. Ang motorsiklo, base sa akong tan-aw gadulhog samtang ang awto nagtungas. Nahitabo ni sa may kurbadahon kaayo nga eskina padung sa Mr. A.
Suhito kaayo ko aning lugara kay pirme ko magbiseklita. Kana nga kurbadahon, kon di ka mag-amping mosaylo ka gyud, masulod sa pikas lane. Hayan mao ni ang nahitabo sa nagmotorsiklo kay diha man sa wala nga side naigo ang sakyanan.
Amping
Kuyaw kaayo ang two-wheel dad-on kay wa kay dag-anan, ikaw ang makaigo o maigo, matumba ka gihapon. Pero ambot makapadagan ning kadaghanan sa nagmotor, maorag way kamatayon. Molusot nga pwerte pang sikita nga usa lang ka gabling sa manubela, magkasingki na.
Sa mga kurbadahon nga dapit, labina kon dulhugon, mas maayo nga momenor ug mobusina, labina kon blind curve aron aware ang driver sa kasugat nga sakyanan nga dunay nagpadung nga motorized vehicle. O kadtong motabok sa karsada nga di dayon makit-an. Kadaghan sa mga disgrasya nga tungod lang sa blind curve.
Hinaut pa nga okay ra ang sakay o mga sakay niadtong motorsiklo. Naluoy usab ko sa mga sakay sa awto nga klaro kaayong na-shock sa hitabo. Bisan kon sad-an pa tingali ang nagmaneho sa motorsiklo, ang mga sakay sa awto manubag gihapon.
Di makaangin
Kon naa gani kita sa karsada, mag-amping ta nga di makaigo ug di maigo. Sa ato gud nga paghinanggaw, makaangin ta sa ubang mga tawo. Kinahanglan kitang magbantay kanunay nga di maigo o makaigo.
Kana bitaw nga magbiseklita ko, magsige kog lingi sa likod ug duha ka mga kilid kon di ba ko maigo og sakyanan nga nagdulong. Gawas nga kinabuhi nako ang nakataya, kon magpataka ko sa pagpadagan, maproblema sab ang makaigo nga nag-amping unta sa pagmaneho.
Busa, magpadagan gani ta og sakyanan, ayaw ibutang sa ulo nga ikaw ang hari sa karsada.