MATAG usa nato adunay tagsatagsa ka mga abilidad nga daygon ug makakuha sa atensyon sa ubang mga tawo.
Ug kini nga mga abilidad usahay mahimong tulay aron mahimamat ang gitagana sa Ginuo alang kanato.
Dinhi nagsugod ang sugilanon sa gugma sa magtiayong Ahmed, 53 ug Annabeth dela Cruz-Cuizon, 57, nga nagsaulog sa ika-19 ka tuig nga anibersaryo sa ilang kasal.
Niadtong 1988, nagtagbo ang dalan sa duha dihang nagkaila sila sa usa ka conference sa mga student leader nga gikan sa lainlaing mga tunghaan didto sa Silliman University sa siyudad sa Dumaguete, Negros Oriental.
Si Ahmed gikan sa Southwestern University samtang si Annabeth sa Cebu State College (karon Cebu Normal University).
Sukad niadto, wala na mawala sa hunahuna ni Ahmed, kasamtangan nga director sa Land Transportation Franchising and Regulatory Board (LTFRB) 3 kun Central Luzon, si Annabeth.
Si Annabeth, usa sa mga writer sa “Ang Suga,” ang opisyal nga student publication sa CNU samtang, si Ahmed mao ang editor-in-chief sa “The Quill” ang student paper sa SWU.
Pag-abot sa Sugbo, ang direktor mag-adtuan na kanunay sa opisina sa school publication sa asawa aron kini makita.
Wa magdugay, nagkauyab ang duha niadtong Abril 17, 1988.
Pag-abot sa Disyembre 28, 1999 sila si Ahmed ug Annabeth nakasal sa Our Lady of Peace and Good Voyage Chapel sud sa Mactan Benito Ebuen Air Base sa dakbayan sa Lapu-Lapu, diin lumad ang mga kaliwat sa babaye samtang taga siyudad sa Sugbo si Ahmed.
Doble ang selebrasyon kay dungan sila nga gikasal sa ig-agaw ni Annabeth, kinsa maoy assistant city administrator karon sa kagamhanan sa siyudad sa Sugbo.
Ang 30 ka tuig nila nga pagminahalay nagbunga og upat ka mga anak nga sila si: Carlo Miguel, 28; nagtrabaho sa Department of Environment and Natural Resources (Denr) 7; Karina Marga, 23, usa ka local artist; Kyle, 21, office worker; ug Anton, 18, tinun-an sa senior high school sa University of San Carlos (USC) south campus.
Bag-ohay lang gisaulog sa magtiayong Cuizon ang ika-19 nga anibersaryo sa ilang kasal niadtong Biyernes, Disyembre 28.
Saysay ni Ahmed, sila nakasal pipila ka adlaw sa wala pa mag 2000 diin gikabalak-an sa pipila ka katigulangan nga basin matapos ang kalibutan ug ang pagtumaw sa Y2K bug o gitawag og Year 2000 bug o Millenium Bug.
“So, mao to kami pud nagpakasal pud mi og dali-dali,” paambit sa director nga nahimuot nga nibalik lantaw sa ilang kagahapon sa asawa. SCG