"SUKWAHI kini sa huna-huna sa uban nga adunay mga hugaw nga mga binuhat ang Diyos."
Sa makadaghan na nakong balik-balik og basa ang unang kapitulo sa Genesis, aduna koy na-obserbahan nga usa ka importanteng punto nga dapat natong mga Kristiyano masabtan.
Sa makapila ka beses, gibalik-balik pod og sulti sa Diyos kining pulong sa Iyang pagbuhat og mga langit ug yuta dinhing dapit sa atong kalibutan.
Kining pulong mao ang paghulagway sa Diyos sa Iyang mga binuhat: maayo.
Sugod sa Iyang pagbuhat sa kahayag sa nahaunang adlaw, hangtud sa Iyang mga binuhat sa ikaunom ka adlaw, ang Diyos nagsulti nga maayo tanan ang Iyang gibuhat.
"Ug nakita sa Diyos ang kahayag, ug kini maayo..." (Gen. 1:4). Mao sab ang Iyang paghulagway sa mga tubig (v.10), mga tanum (v.12), mga iwag sa kalangitan (v. 18), mga langgam ug mga binuhat sa tubig (21), mga hayop ug tawo (v. 25). Ug ang Iyang pangtapos nga paghulagway sa tanang Niyang binuhat mao ang: hilabihang maayo (v. 31).
Walay binuhat ang Diyos nga bati, dautan o hugaw- tanan maayo. Sukwahi kini sa huna-huna sa uban nga adunay mga hugaw nga mga binuhat ang Diyos. Tungod niini, gusto ko kamo dad-on sa duha ka mga punto nga naghatud sa paghulagway sa Diyos sa Iyang mga binuhat nga maayo.
Una, ang tanang binuhat sa Diyos perpekto kay wala pay sala nga nakasulod dinhi sa atong kalibutan. Kini nagpasabot nga ang tanang mananap dili pa mga bangis sama sa kasagarang mga mananap karon, tungod kay kung basehan nato ang ilang ginakaon sa una, puro mga sagbot o tanum (v. 30).
Ikaduha, ang tanang mga binuhat adunay nagkadaiyang purpose o gamit. Ug sa ing-ani nga punto, ang tanang binuhat sa Diyos maayo.
Ang punoan sa kahoy maayo alang sa iyang tumong sa pagkarga sa mga sanga, dahon ug prutas. Ang mga bato maayo alang sa iyang tumong nga kusgan kaayo ang mga bukid o burol nga kini maoy pundasyon. Maayo pod ning mga bato nga himuong pundasyon sa atong mga balay karon. Ang mga mananap maayo nga maoy naga-trim sa mga tanum ug magpabilin sa kahapsay sa harden. Maayo pod silang maglingaw-lingaw ni Adan ug Eba.
Tinuod sab kining punto sa kasamtangan. Ang baka ug kabaw maayo nga pangdaro. Ang iro maayo nga tigbantay sa balay. Ang iring maayo nga tiggukod sa mga peste sa balay. Ang kahoy o bato maayo nga panghimo og balay. Ug ang baboy, pasayan, hipon, maayo nga panglimpyo sa mga hugaw sa kalibutan.
Pero, dili ang tanan maayo nga pagakaonon. Kay dili man pagkaon ang ilang purpose o tumong sa ilang pagkabinuhat.
Kung kinsay nag-una-una og kaon niining mga mananap ug nagbungkag sa ilang tagsa-tagsa ka mga tumong, wala kita nasayud. Pero kung atong sundon ang Ginoo, makuha lamang nato ang mga panalangin nga hatud niining mga binuhat kung ato silang gamiton sa ilang sakto nga nagkadaiyang tumong.
Malipayong pagselebrar sa Christmas alang kanatong tanan, ug sa paggamit sa mga binuhat sa Diyos sa ilang saktong tumong.