DAVAO DEL SUR -- Gipasabot ni Engr. Godofredo Guya ang tanang mamahayag sa probinsiya kon nganong nalugwayan pa ang iyang termino isip general manager sa Davao del Sur Electric Cooperative (Dasureco).
Si Guya atol sa Media Partners Night niadtong Biyernes sa gabii, nagbutyag nga natapos na iyang termino niadtong bulan sa Pebrero.
Sumala niini nga adunay tulo ka mga resolusyon ang giduso ug giaprobahan sa National Electrification Administration (NEA).
Atol sa Dasureco 37th Annual General Members Assembly (AGMA) naaprobahan ang Board Resolution 08-2017 alang sa paglugway sa katungdanan ni Guya.
Laing duha ka mga resolusyon sab ang giduso sa mga Board of Directors (BoD) aron lugwayan pa og tulo ka tuig si Guya.
Subay sa maong resolusyon giduso niini nga di mokanaug si Guya hangtud di mapili ang kuwalipikadong general manager sa Dasureco.
Aprobado na sab ni NEA Administratoe Edgardo Masongsong ang tulo ka mga resolusyon hinungdan nagpabilin si Guya sa katungdanan.
Gipahibawo sab ni Guya nga nominado siyang representante sa partylist Rural Electricity Consumers and Beneficiaries Development and Advancement (Recoboda). (Orlando B. Dinoy)