BISAN kon gipahamtangan na og silot sa tagdumala sa Ateneo de Manila University (ADMU) ang ilang tinun-an sa junior high school nga nahilambigit sa bullying, wala pa gihapon mahunong sa social media ang sobra nga pagsaway, kondinar ug kantiyaw sa netizens batok sa maong batan-on. Gani na-apil na ang iyang pamilya. Human sa imbestigasyon sa administrasyon sa ADMU, nasuta nga sad-an ang maong batan-on. Buot ipa-sabot nga siya gyud ang nang-bully sa iyang classmate.
Dismissal o expulsion ang desisyon sa administration sa university. So, dili na siya tugutan nga makabalik sa pag-eskuwela. Inig balik sa klase karon sunod semana, dili na siya maka-eskuwela. Posible nga ma-undang siya ug dili niya matapus ang school year. Sayang. Dili pod dayon siya maka-transfer og laing eskuwelahan. Ambot og duna pod ba kahay modawat nga eskuwelahan nga napagya naman kaayo ang iyang dagway ug hulagway.
Ang nakapa-it kay ang mga netizens sobra ra nakabiay-biay. Mora bag nakahimo siya og niluog nga krimen. Kalapasan man ang iyang nahimo sa Anti-bullying Act of 2013, apan di kaayo grabe usab ang iyang salaod. Gawas pa, gisilutan na siya sa tungha-an. Unsa pa may gusto sa uban? Bitayon ang maong tinun-an? Hunungon na unta nila ang ‘cyber bullying’. Bisan si Fr. Jose Ramon Villarin, Presidente sa ADMU, nanawagan sa netizens nga ihunong na ang ilang pagkondinar sa tinun-an gumikan kay ila nang napahamtangan og silot.
Ang nakapait kay apil ang pamilya sa tinun-an nadamay. Ang iyang amahan nga pulis nga gi-assigned sa Mindanao gihinganlan nga nahilambigit sa illegal nga drugas. Wa kuno maka-disiplina sa iyang anak. Ang igsoon sa batan-on, gi-apil sab kay kusog kuno mang-bully. Louy sab baya sila.
Ubos sa anti-bullying law, gidili ang pagpagawas sa pangalan, hulagway ug ubang mga information sa mga tinun-an nga nahilambigit sa bullying labi pa gyud kon mga menor de edad. Highly confidential ang tanang detalye. Sama sa balaod nga protection against children, gidili usab ang pagbutyag sa mga information kabahin sa bata nga nahilambigit og usa ka krimen. Ang mainstream media nahibalo niining maong mga balaod. Apan ang netizens ginamit ang teknolohiya, way kabangga-an niini og tira pasagad nalang. (bobbygnalzaro@gmail.com)