SUPERBALITA CEBU

Kiha batok nako pamulitika: Frasco

MIPASANGIL si kanhi Liloan mayor Vincent “Duke” Frasco nga namulitika ang iyang kaatbang sa eleksyon sunod tuig sa pagkabanhaw sa kasong administratiba nga gipasaka batok niya ngadto sa Sangguniang Panlalawigan sa Sugbo kabahin sa scholarship program nga gipatuman sa lungsod.

Apan si Provincial Board Member Raul Bacaltos, chairman sa committee on complaints and investigation nga nitakda sa preliminary conference sa kaso batok ni Duke karong Enero 25, nitataw nga wa kini bulok pulitika.

Niadtong 2015, si kanhi Liloan bise mayor Lucelito Pilapil nisang-at og kasong grave misconduct, grave abuse of authority ug conduct unbecoming of a public official ngadto sa PB batok ni Duke gumikan kay giingong way appropriation ordinance ang pag-apud-apod niini og P3 milyones nga scholarship grants ngadto sa angayang mga tinun-an sa lungsod.

Ang maong kantidad gikan sa P6 milyones nga alokasyon alang sa solid waste management program sa Liloan, nga gipundohan ubos sa development fund sa lungsod.

Si Duke unang nihimakak sa pasangil ni Pilapil kay matod niya niabot og 6,000 ka mga tinun-an sa high school ug kolehiyo ang nakapahimus sa grant sa nangaging walo ka tuig ug nagtuo nga namulitika lang si Pilapil.

Si Pilapil, ang nakaatbang sa pagka mayor apan napilde sa asawa ni Duke nga si Liloan incumbent Mayor Christina Frasco sa miaging 2016 elections.

Si Duke nitumbok ni 5th District Rep. Ramon “Red” Durano VI ug ang Barug Alang sa Kauswagan ug Demokrasya nga maoy nagpaluyo sa pagkabuhi sa kaso nga gisang-at batok niya ni Pilapil tulo ka tuig na ang nakalabay.

“Adunay advance Christmas gift kanako ang akong kaatbang pagka Congressman. Tinuyo gyud na panahon nasad sa Pasko na ila kitang daug-daugon kay lagi sila man ang gamhanan,” pahayag sa kanhi mayor sa iyang Facebook account niadtong Disyembre 21 nga niabot na og 68 ka shares ug 363 ka reactions hangtod alas 6:45 sa kagabii.

Si Duke namahayag sa iyang post nga tingali nakakita ang iyang mga kaatbang sa labing uwahing mga resulta sa survey hinungdan nangita kini og paagi nga mapugngan siya sa iyang pagdagan pagkakongresista atbang ni Durano.

“Perhaps it is no coincidence that this case should rise from the dead now that the Duranos’ 70-year rule over the 5th District is being seriously challenged,” dugang ni Duke.

Apan sigon ni Bacaltos, na-timing lang ug way malisya ang pagpatawag og preliminary conference sa iyang komitiba sa kaso ni Duke ug wa kini pamulitika.

“Ako nang gi-inventory kay gusto nako mahuman na nato. Kon moingon nga pulitika, wa may pulitika nang naa. Wa gyud mi magkaestorya ni Red, wa sad mi magkaestorya ni Magpale (Vice Governor Agnes Magpale), ako gyud ang nagbuot ana nga maeskedyul na katong mga pending bitaw,” pagpasabot ni Bacaltos, kinsa nidugang nga upat ngadto sa unom ka mga kaso ang gusto niya nga madesisyonan na.

Si Atty. Magnificus Cañete, tigpamaba ni Cong. Red, namahayag nga bisan ang kongresista wa mahibawo kon unsa mahitungod ang kaso nga giatubang ni Duke sa PB.

“Nganong makamandar man si Cong. Red nga to think how he (Bacaltos) voted sa building (resource center), I don’t think he can be dictated upon,” dugang sa manlalaban dihang nahinabi sa Superbalita Cebu.

Si Bacaltos ang usa sa unom ka mga bokal nga nibotar og “no” alang sa pagpirma og kontrata ni Gobernador Hilario Davide III alang sa pagpatukod sa kontrobersiyal nga 20 ka andana nga resource center sa Capitol compound.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph