DUNAY mga pulis ug government officials dinhi sa Sugbo nga padayong nagprotektar sa ilegal nga drugas.
Ang usa sa mga kanhi sakop ni self-confessed drug lord Franz Sabalones nga nasikop sa kapulisan kagahapon nibutyag og mga ngan sa mga police official sa Central Visayas ingon man mga opisyal sa kagamhanan dinhi sa Sugbo.
Si Sr. Supt. Manuel Abrugena, hepe sa kapulisan sa probinsya sa Sugbo, wala lang una mohingalan sa mga pulis nga gitug-an sa suspek ipaubos pa nila kini sa imbestigasyon.
Apan iyang gikompirmar nga adunay gipangtug-an nga mga personalidad si Tocelio Dibalucos Ababon, 49, taga barangay Tabunok, Siyudad sa Talisay sa habig sa kapulisan apan wa niya giklaro kon naa pa ba sa Sugbo nadestino.
“We are still validating po yung information na yun. However, we cannot yet divulge yung mga pangalan because we are conducting follow up operations and at the same time pina validate pa natin. Kasi kung i divulge natin baka maka alerto kaagad sila,” matod ni Abrugena.
Daghan pa nga makuhang kasayuran ang kapulisan kang Ababon, matod ni Abrugena, ilabi na nga nakatug-an kini kinsa ang naghatag kaniyag proteksyon.
Tungod niini gimandoan niya ang Provincial Intelligence Branch (PIB) nga palawman pa ang imbestigasyon aron masayran kon unsa ka tinuod ang pamahayag ni Ababon.
Si Ababon nasikop sa buy bust operation sa Provincial Drug Enforcement Unit ug Provincial Intelligence Branch sa Cebu Provincial Police Office sa sitio Bilibid, Barangay Casay lungsod sa Argao alas 6 sa buntag sa Sabado, Disyembre 29.
Siya nalakip sa High Value Target sa kapulisan sa probinsya sa Sugbo.
Nakuha gikan kang Ababon ang pito ka dagkong putos sa gituohang shabu nga motimbang og 1.5 kilos nga mobalor ang tanan og P10,200,000, lakip na ang P15,000 nga gituohang halin sa dinakpan.
Sama sa ubang mga nakuhang drugas sa syudad sa Sugbo nga kolor brown, mao usab ang ilang nasakmit kang Ababon.
Nagtuo ang kapulisan nga usa ra ang ilang gikuhaan sa supply sa ilegal nga drugas nga mao karon ang ilang subayon.
Matod ni Sr. Insp. Alejandro Batobalonos nga taodtaod na nilang gipangita si Ababon apan wa na nila makit-i sa Barangay Tabunok ug ning bag-o lang ilang nasayran nga mibalhin na kini sa lungsod sa Argao.
Nihimo silag surveillance ug sa dihang nasayran nila nga nag padayon kini sa iyang illegal nga negosyo milusad dayon silag buy bust operation gamit ang P260,000 nga play money.
Giingong makabaligya matag semana si Ababon og kapin sa usa ka kilo.
Gani di kini modawat kon di moabot sa 200 gramos ang mopalit kaniya.
Niadtong 2016 atol sa paglingkod sa katungdanan ni President Rodrigo Duterte, nitahan si Sabalones human maapil sa listahan sa mga big time drug lord sa Pilipinas. Dugang taho ni GPL