KAGAMHANAN sa dakbayan sa Mandaue usa sa nakadawat og pasidungog sa labing una nga National Anti-drugs Abuse Council Performance Award.
Labing una kini nga gihatag nga pasidungog sa Department of Interior and Local Government (DILG) sa mga lokal nga kagamhanan nga nakakuha og grado nga 85 ngadto sa 100 points rating alang sa ideal nga high functionality sa Anti-Drug Abuse Council (ADAC).
Ang dakbayan sa Mandaue ang nakakuha og 93 porsyento functionality sa City Anti-drugs Abuse Council (Cadac), atol sa 2017 ADAC Performance Audit.
Si Konsehal Kevin Cabahug ang nidawat sa pasidungog didto sa kauluhan niadtong Byernes, Disyembre 28, isip representante sa Mandaue City Government.
Ang Mandaue City lang sa tanang mga syudad sa Central Visayas ang nakadawat sa maong pasidungog.
Adunay 1, 715 ka probinsya, syudad ug munisipalidad ang nasud, diin 241 lang ka local government unit (lgu) ang nakakuha sa mga grado nga nagsugod og 85 percent.
Laing nakadawat sa susama nga pasidungog sa Central Visayas ang Cebu Province, Bohol Province ug ang lungsod sa Argao habagatang Sugbo.
Gipasabot ni Bise Mayor Carlo Fortuna nga dakong suporta sa kagamhanan diha sa pagpatuman sa kapulisan sa Oplan Tokhang ug Double Barrel Alpha, ang usa sa nakatampo sa dako nga grado nga ilang nakab-ot.
"The source of information from both the police and the anti drug abuse councils in the barangay lead to the surrender of thousands of people using drugs, the arrest, capture and even neutralization of the persons involved in the Illegal drug trade," pasabot ni Fortuna sa Superbalita Cebu.
Ikaduha sa rason mao ang full activation sa tanan nga Barangay Anti Drugs Abuse Councils (Badacs) sa Mandaue ug ang regular nga monitoring sa Cadac sa operation sa anti-drugs campaign ug sa pagpatuman sa community-based drug rehabilitation program.
Laing nakatampo mao ang paggahin sa kagamhanan og P10 milyones nga budget alang sa anti-drugs program ug paghatag og 200 mil pesos sa matag Badac nga malampuson diha sa gipahigayon nga drug rehabilitation program.
Dugang ni Fortuna nga ang dakbayan sa Mandaue ang labing una sa nasud nga nipatuman sa community-based rehabilitation program gamit ang 'Matrix Intensive Outpatient Program" sa Department Of Health.
"In fact, we are one of the pilot LGUs in the entire country by the DOH and DDB. And we are the only LGU in the Visayas that was granted an Outpatient Drug Treatment Clinic by the DOH and DDB," dugang pasabot ni Fortuna.
Tungod sa nadawat nga pasidungog, matud ni Fortuna nga nagsilbi kini nga hagit aron mas mahimo nga agresibo sa kampanya sa pagpakunhod sa ihap sa mga drug user ug pagwagtang sa hingpit sa patigayon ug pagpamaligya sa iligal nga drugas sa syudad, aron mahimo nga mas luwas nga puy-an ang syudad sa Mandaue. (FMD)