POLICE Senior Superintendent Julian Entoma, director sa Mandaue City Police Office (MCPO), nipasusi sa iyang mga sakop kon pila ang mga firearm holder sa kada barangay sa dakbayan.
Kini aron mas mapadali ang himuon nga imbestigasyon kon ugaling adunay matala nga indescriminate firing sa syudad atol sa pagsugat sa Bag-ong Tuig sa Disyembre 31.
Kapulisan sa syudad sa Mandaue ang gipahinumduman usab nga di gyud mogamit sa ilang mga armas sa pagpabuto sa pagsugat sa New Year aron kalikayan nga adunay mabiktima sa stray bullet.
Si Entoma niawhag usab sa publiko nga kuhaan og hulagway, ilabi na video kon adunay makit-an nga tawo nga magdala-dala og armas, ilabi na kon masuta nga di kini pulis, o kon makaatol gyud nga adunay nagpabuto atol sa pagsugat sa tuig 2019, aron dali ang pag-ila sa mga responsable ug makatabang sa kapulisan alang sa pagkuha og ebidensya.
Samtang, sugod niadtong Sabado Disyembre 28 hangtud Lunes, bisperas sa Bag-ong Tuig, mohimo na sa pagpatrolya sa kabarangayan ang mga polis aron sa pagsikop sa mga naninda og mga gidili nga pabuto ug pagpangkompiskar niadtong way permit sa pagpamaligya.
Nakig-alayon na ang MCPO sa mga barangay officials nga patabangon ang mga tanod sa pagbuyag o pagsikop niadtong masakpan nga mogamit og pabuto sa dili designated nga firecracker zone. (FMD)