GIILA nga hitman sa dakbayan sa Toledo ang napatay sa kapulisan human kini misukol atol sa pag-serve og arrest warrant niini kagahapon sa buntag, Disyembre 30, sa Sitio Langub, Barangay Guadalupe, dakbayan sa Sugbo.
Si Hamilton Juares, 32, nag-atubang og kaso nga attempted murder. Taga Toledo City, si Juares apan nag-abang og apartment sa Guadalupe, Cebu City.
Si Juares ang giingong gapatay sa usa ka jail guard sa Cebu Provincial Detention and Rehabilitation Center (CPDRC) niadtong Nobiyembre 25, 2018 sa eskina Happy Valley Street, Barangay Kalunasan, Cebu City.
Matod ni Sr. Insp. Alejandro Batobalonos, hepe sa Provincial Intelligence Branch (PIB), ang warrant giisyu ni Toledo City Regional Trial Court (RTC) Branch 69.
Ang PIB ug Provincial Drug Enforcement Unit (PDEU) ang nag-serve sa maong warrant, uban ang taga Police Station 9 sa Cebu City Police Office.
Matod ni Bartobalanos, alas 11 sa buntag sa Disyembre 30, usa ka babaye ang gisugo nila sa pagtuktok sa apartment ni Juares.
Niabot pa og 15 minutos una nangabli si Juares.
Igo rang gilili kinsay nanuktok, dayon nanira.
Nibalik kini ug nisuway og pabuto sa iyang kalibre.45 apan ang pusil wala makabuto. Samtang nag-reload og bala si Juares sa iyang pusil, naunhan na siya sa mga pulis og tira.
Naigo sa dughan si Juares ug namatay diha-diha.
Niadtong 2017, gipusil ni Juares ang RTC Toledo City sheriff nga ni-serve og subpoena kaniya.
Nagnegosyo usab si Juares og ilegal nga drugas sa Toledo ug daw nagsige pa kini og supply sa dapit.
Gibutyag usab ni Batobalonos nga aduna’y napatay si Juares nga miyembro sa usa ka frat sa Toledo.