GIBALIK-BALIK sa pagpasabot ug pagpahibalo ni Misamis Oriental Governor Yevgeny Vincente Emano ngadto sa katawhan sa Misamis Oriental kalabot niining gipakatag sa iyang mga kaatbang nga nagloan ang Kapitolyo aron iyang gamiton sa umaabot eleksyon.
“Taas pa kaayo nga proseso nga ma-avail nato kining omnibus loan ug mahuman na lang ang eleksyon dili pa maaprobar kini. Ang akong gihimo karon pagpangandam lamang aron atong mga proyekto masugdan na deretso,” matud ni Emano dihang gihinabi sa mga sakop sa media.
Gidugang niini nga mismong ang bangko maoy ni-offer niining talagsaon nga oportunidad tungod kay karon lang tuig 2018 kini gitanyag sa Land Bank of the Philippines. Kini kay nakita sa bangko nga angayan ug adunay ikabayad ang Kapitolyo Probinsyal niini.
“Una naghupot kita og Seal of Good Local Governance Award (SGLG), ikaduha maayo kaayo kita mobayad ug walay utang ang Kapitolyo mao gi-offeran kita niining bangko og omnibus loan,” pagpasabot ni Emano.
Giingong sayop matud pa kaayo ang gipakatag sa iyang kaatbang kalabot niini tungod kay ang maong loan alang man sa proyekto ug programa sa Misamis Oriental ug dili ingon ana kataas ang porsiyento niini hilabina “good payer” ang probinsya.
Sa pangutana nganong karon pa nahunahuna-an niini nga magloan hinungdan nagamit gyod kini sa iyang kaatbang pagpangdaot.
“Kay karon pa ni gi offer sa bangko ug sa sunod tuig wala na nia nga opportunity kay lakip ni sa programa sa bangko,” dugang ni Emano.