NADESISYONAN nga karong Enero 9, 2019 ibalik ang mga basura nga gikan sa South Korea nga nahidangat sa lungsod sa Tagoloan, Misamis Oriental niadtong Hulyo 21, 2018.
Kini ang gikumpirma ni Bureau of Customs (BOC) Collector John M. Simon sa Mindanao International Container Port ug miingon nga positibo ang closed-door meeting nila tali sa mga nahidangat nga South Korean officials, opisyales sa Phividec, Verde Soko ug local nga kagamhanan sa lungsod sa Tagoloan.
Matud ni Simon nga ilang nasabotan nga ang Verde Soko maoy magpadala niini og balik sa South Korea ug gasto sa gobyerno sa Korea ang pagpabalik niini.
Dugang ni Simon nga nahukman sab nga dili maayo nga magdala og basura nga wala’y insaktong deklarasyon.
Mokabat sa 50 ka toneladang basura niabot dinhi sa lungsod sa Tagoloan ug gihatagan lamang og usa ka bulan nga lugway aron kining tanan mahurot ug padala og balik sa ilang nasod.
Kahinudmuman nga gikabalaka na pag-ayo sa mga residente ug opisyales sa maong lungsod tungod kay nagkadugay kini sa dapit ug nanimaho na kini.
Unang gideklarar nga "plastic synthetic flakes" apan nadiskubre nga ang sulod niini adunay mga kahoy, dextrose tubes, used diapers, batteries, bulbs, ug electronic equipment.