TULO ka local government units sa probinsya sa Sugbo ang gipasidunggan sa Department of Interior and Local Government (DILG) sa labing una nga National Anti-Drug Abuse Council Performance Award niadtong Biyernes, Disyembre 28.
Ang awardees mao ang mga kagamhanan sa lalawigan sa Sugbo pinaagi sa Cebu Provincial Anti-Drug Abuse Office (Cpadao), lungsod sa Argao ug siyudad sa Mandaue.
Labing una kini nga pasidungog nga gihatag sa DILG sa mga lokal nga kagamhanan nga nakakuha og grado nga 85 ngadto sa 100 points rating alang sa ideal nga high functionality sa Anti-Drug Abuse Council.
Giila sa ahensiya ang gipakitang mga paningkamot ug pagtuman sa mga responsibilidad ug gimbuhaton sa maong mga LGU sa pagplano ug pagpatuman sa anti-illegal drugs program, mga proyekto ug mga kalihukan sa pagsumpo sa gidili nga drugas.
Ang dakbayan sa Mandaue nakakuha og 93 porsyento functionality sa City Anti Drug Abuse Council (Cadac), sa 2017 ADAC Performance Audit.
Sila si Cpadao Executive Director Carmen Remedios Durano, operations division head Diane Patricio ug Manuel delos Santos ang nidawat sa pasidungog alang sa lalawigan samtang si City Councilor Kevin Cabahug ang nidawat alang sa Mandaue niadtong Disyembre 28 sa Tent City sa Manila Hotel sa kaulohan.
Sa naunang interview, sumala ni Durano apil sa gitan-aw sa audit team ang pundo alang sa opisina ug paggamit niini alang sa mga programa subay sa plan of action, mga kabag-uhan nga gihimo sa buhatan, barangay drug clearing, drug affectation sa lugar ug ang ayudang teknikal ug pinansiyal ngadto sa mga munisipyo ug barangay.
Dugang ni Durano ang maong pasidungog nagpasabot nga gihimo sa Cpadao ang trabaho niini ug nagpakita nga pagtukod sa maong buhatan dili gumikan sa propaganda.
Mandaue City
Samtang, gipasabot ni Mandaue City Vice Mayor Carlo Fortuna nga dakong suporta sa kagamhanan, diha sa pagpatuman sa kapulisan sa Oplan Tokhang ug Double Barrel Alpha, usa sa nakatampo sa dako nga grado nga ilamg nakab-ot.
Ikaduha sa rason mao ang full activation sa tanan nga Barangay Anti Drugs Abuse Councils sa Mandaue ug ang regular nga monitoring sa Cadac sa operation sa anti-drugs campaign ug sa pagpatuman sa community-based drug rehabilitation program.
Laing nakatampo mao ang paggahin sa kagamhanan og P10 milyones nga budget alang sa anti-drugs program ug paghatag og P200 mil sa matag Badac malampuson diha sa gipahigayon nga drug rehabilitation program.
Dugang ni Fortuna nga ang Mandaue ang labing una sa nasod nga nipatuman sa community-based rehabilitation program gamit ang Matrix Intensive Outpatient Program sa Department of Health.
“We are one of the pilot LGUs in the entire country by the DOH and DDB. And we are the only LGU in the Visayas that was granted an Outpatient Drug Treatment Clinic by the DOH and DDB,” matod ni Fortuna.
Gikan sa 1,715 ka mga lalawigan, siyudad ug kalungsoran, 241 ka mga LGU ang nakakuha og 85 ngadto sa 100 points nga tukma sa adjectival rating nga ideal sa high functionality.
Ang Argao ug Mandaue lang ang bugtong lungsod ug siyudad sa Central Visayas nga nakadawat sa maong pasidungog diin apil ang lalawigan sa Bohol sa mga gipasidunggan.
Apan usa ka adlaw human sa pasidungog, nadakpan sa Barangay Casay, Argao ang giingong sinaligan sa self-confessed drug lord, Franz Sabalones nga si Tocelio Dibalucos Ababon, kinsa nakuhaan og 1.5 ka kilo nga gituohang shabu nga gibanabanang mobalor og P10.2 milyones. SCG, FMD