GIHAKOP sa kahadlok ang mga tinun-an sa Binlod Elementary School sa Binlod, Argao, Sugbo.

Kini human patya niadtong Miyerkules sa hapon ang magtutudlong lalake sa grade 6 sud sa iyang classroom.

Click here for stories and updates on the Sinulog 2010 Festival.

Laing mga ginikanan nangabalaka sab sa seguridad sa ilang mga anak hinungdan nga wa una nila patunghaa ang ilang mga anak.

Kini samtang panagbangi sa pamilya o personal ang duha ka mga motibong gisusi karon sa kapulisan sa pagpatay kang Romeo Duran, 52.

Si Binlod brgy. captain Arnel Rubin niingon nga nagkinahanglan og dinaliang counseling ang mga tinun-an, ginikanan ug magtutudlo.

Bisan kon nimando si Dept. of Education Regional Director Recarido Borgonia kang teacher-in-charge Ingracia Alcain nga magklase, ang insidente naghimong imposible tungod sa kagamay ra sa mga tinun-an.

Ang tunghaan dunay populasyon nga 328, matod ni Rubin sa lahi nga interbyu sa sibyaanang dyLA.

Si Argao Mayor Edsel Galeos nakigsulti kang Rubin ug nipada og social workers aron pagsusi sa pagpahigayon sa counseling sessions alang sa mga tinun-an, ginikanan ug magtutudlo.

Si Rubin niingon nga kinahanglang ipaneguro ngadto sa mga tinun-an ug ginikanan nga di na mobalik ang mga mamumuno.

Apan hangtod nga di sila mapakalma, si Alcain naglaom nga butangan og pulis ang tunghaan.

“Hangtod lang na maulian sila ug maka-adjust,” matod ni Alcain sa mga tigbalita nga ningduaw sa tunghaan kagahapon.

Samtang, panagbangi sa pamilya o personal nga kasungian ang gisusing motibo karon sa kapulisan sa pagpatay kang Duran kini human dunay nakadungog nga nagkalalis ang biktima ug iyang mga igsuon.

Apan, sila si Melinda ug Erlinda Duran, mga igsuon sa biktima, nanghimakak nga duna silay kalabutan sa kamatayon sa ilang igsuong maestro.

Kini bisan kon nagkaaway sila mga pipila ka semana ang nakalabay ug dunay nabuhiang mga sakit nga pulong.

“ Nakaingon nga maynta mamatay ka. Pero sa kasuko ra to. Sa akong pasabot, dili sa pusil,” matod ni Melinda.

“Igsuon gud mi, di mi ganahan ana,” niingon si Erlinda.

Samtang usa ka team ang gitukod sa pangulo sa Cebu Provincial Police Office aron maoy motutok sa krimen.

Si Senior Supt. Erson Digal niingon nga ang investigating team pangulohan ni Insp. Ruben Cuizon inabagan sa mga sakop sa kapulisan sa Argao.

Matod ni Digal nga mopagawas na unya silag cartographic sketch sa nawong sa mga responsable sanglit daghan mang mga saksi ang ilang nakuha ug nakakita sa mga nagpusil.

“Wala man magtaptap ang nagpusil ug kadtong tulo nga nagpaabot sa gawas. So, daghan tag-witness nga nakakita,”asoy ni Digal.