MINNEAPOLIS - GITAGNA ni two-time world title challenger ug San Diego based pinoy fighter Mercito “No Mercy” Gesta nga modaug Unanimous Decision si pinoy boxing icon ug WBA Welterweight Champion Manny “Pac-Man” Pacquiao batok ni challenger ug three-division Champion Adrien “The Problem” Broner.
Matod ni Gesta nga walay dag-anan sa puntosay, paabtikay ug kapaspas si Broner (30 anyos) bisan paman sa gintang sa pangedaron nila ni fighting Senator Pacquiao (40 anyos).
“Tinuod counter puncher si Broner, bag-o siya’g trainer Kevin (Cunningham) apan di siya maayo mangitag timing sama ni Juan Manuel Marquez nga kahibalo kanus-a mobuhi sa kinumo” sugilon ni Gesta sa Superbalita Cebu via Telephone.
Ang edad ni Pacquiao dili problema segunda ni Gesta, tungod kay si Pac-Man sakto sa kaugalingon nga disiplina, iyang sanglitanan si former unified Champion Bernard Hopkins nga sikat gihapon ug Kampeyon bisan lapas na sa kwarenta.
“Kung modaug si Broner knockout ra gyud, pero subidahon kaayo tungod sa iyang estilo nga dugay kapasulod, saludo ko ni Manny sa iyang kataas sa lahutay ug awkwardness (bakikaw) style mao na iyang forte, lisod kaayo na buhaton pero makaigo ra ba gyud” dugang sa lumad nga taga Barangay Labogon, Mandaue City, Cebu.
Matod sa kanhi Muay Thai fighter-turned boxer nga si Gesta nga dili ni sama kainit sa Mayweather-Pacquiao apan ang personality ni Broner nga sungogan unya gikan sab midaug nga KO7 si Pacquiao batok Lucas Matthysse busa mokita gihapon ni nga away.
Si Gesta, anak nila ni Cito Martial Arts Club (C-MAC) Master/Founder Toong, San Remegio native ug former Amateur boxer Anecito Sr. ug Mercedes Moya Gesta.
Gikasal si Gesta sa miaging tuig sa pag-umangkon ni kanhi Lapu-lapu City Mayor Arturo “Boy” Radaza nga si US born and raised Samantha “Summer” Radaza-Gesta (anak ni Delfin ug Adeline Del Prado Radaza).
Si Gesta, kasamtangang WBO NABO Lightweight King gitakda unta nga moaway karong Enero 26 sunod tuig sa Toyota Center sa Houston, Texas sa Golden Boy Promotions apan giuktaba sa Pebrero sanglit ang iyang trainer Freddie Roach motutok una kang Pacquiao.
Ang Pacquiao-Broner Championship ipahigayon karong Enero 19, 2019 Sabado (Domingo RP Time) sa Gambling Capital of the World Las Vegas, Nevada, USA pinaagi sa TGB, Mayweather, MP ug About Billions Promotions nga isalida sa Showtime Pay Per View. (Daniel Quindao Guden, US Correspondent)