MADAGAYAONG bag-ong tuig kaninyong tanan!
Magtulo na ka tuig ang administrasyon ni Presidente Rodrigo Duterte. Daghan ang nalipay ug di pod malikayan nga daghan ang nagminghoy.
Ang nangalipay kadtong nakatagamtan sa kabag-ohan nga iyang gisaad sa panahon sa eleksiyon niadtong Mayo 2016. Ang nagminghoy kadtong naigo sa iyang giyera batok ilegal nga druga, kurapsiyon sa gobyerno ug ang mga rebeldeng grupo.
Apil sa nagminghoy ang lokal ug internasyonal nga human rights groups sa gitawag niining "state of impunity" o ang nagsulabi nga pagyatak sa tawhanong katungod sa anaa sa gahum.
Sa pagkatinuod lisud timbangon ang gusto ug dili gusto sa kagamhanan karon. Apan niadtong Disyembre nagpaguwa ang Social Weather Station (SWS) sa ilang surbey sa katapusang kuwarter sa tuig nga nisaka ang "approval rating" ngadto sa sobra 70%.
Gikuha kining surbey sa mga 1,000 ka "respondents" o tigtubag sa pangutana sa tibuok nasud. Kung kini ang basihan sa pangutana kung nakauyon ba kita sa dagan sa administrasyon ni PRody, dako kaayong rason nga motuo kita niini.
Kita nga taga Davao makakita, makadungog ug makabati sa kabag-ohan sa palibot.
Hinuon atong masabtan nga dili dali, hinanali ug kalit ang kausaban nga atong gihandom basta nasayod kita nga may gobyerno nga nagtagad sa mulo ug kahimtang sa yanong katawhan.
Sa laing bahin, nihiwi ang nawong ni Senador Antonio "Sonny" Trillanes III sa resulta sa bag-ong surbey sa SWS.
Dili daw kini tinuod ug hinunua tipik lang sa "fake news" nga gipakaylap ang administrasyon ni PRody ug wala naglarawan sa tinuod nga sentimento sa katawhang Pilipino.
Mao usab kini ang baruganan sa oposisyon nga nagplano na karon og epektibong estratehiya de politika nga mapildi ang pro-administrasyon nga kandidato sa bugnong lugaynon sa Mayo 2019. Kinahanglang buhaton kini sa oposisyon kay kung dili, silang tanan mahanaw o mangaparot sa sunod nga eleksiyon ug wa na unyay magsaba-saba batok sa kasamtangang administrasyon.
Niadtong niaging semana, gianunsiyo ni Department of Interior and Local Government Secretary Año sa usa ka pressconference nga may 80 ka politiko nga nagpapili pag-usab nga anaa sa ilang narco-list. Kung siya lang daw ang pagbut-on, ibutyag niya sa publiko ang ilang mga pangalan aron dili botohan sa mga botante.
Ambot kaha kung ang tanang anaa sa narco-list kay taga-oposisyon? Para kanako bisan tuod taas ang approval rating sa pangulo daghan pa siyang angayang buhaton ilabi na sa hisgutanang pangkalinaw. Unta dili niya sirad-an ang ganghaan sa peace talks sa CPP/NPA-NDF nga nagsaulog sa ilang ika-50 nga anibersaryo.