BISAN gikuha og balik sa Team Pilipinas si naturalized player Andray Blatche alang sa importanteng kampanya niini sa 6th window sa FIBA World Cup Asian qualifiers karong Pebrero, gipang-apil gihapon ni national coach Yeng Guiao sila si Stanley Pringle ug Christian Standhardinger sa national training pool.
May dugong Pinoy man tuod apan sila si Standhardinger ug Pringle nalista nga naturalized players sa Fiba kon moduwa kini sa Team Pilipinas tungod kay wala man kini nakakuha og Philippine passport sa wala pa kini nag-edad og 16 nga maoy gikinahanglang dokumento sa FIBA.
Unya sa balaod sa FIBA, usa ra ka naturalized player ang makaduwa sa matag partisipanteng nasod. Nagpasabot nga dili puwedeng magdungan og duwa sila si Blatche, Standhardinger ug Pringle.
Ning puntoha, hugot na ang desisyon ni Guiao nga kuhaon og balik ang ex-NBA player nga si Blatche alang sa 6th window apan iyang gitataw nga gikinahanglan gihapon niya sila si Standhardinger ug Pringle nga maapil sa national training pool.
Sa 6th window, ang Team Pilipinas nagkinahanglang modaog sa ilang pagsulod sa Qatar karong Pebrero 21 ug Kazahkstan karong Pebrero 24 aron magpabiling buhi ang ilang paglaom nga maka-qualify alang sa 2019 FIBA World Cup. ESL