Mongaya: Tuig sa fake news o kamatuoran?

DUGAY na man kining kalaki sa political propaganda nga gitawag sa Iningles nga disinformation ug misinformation. Apan nigrabi kini kaniadtong 2016. Mosamot ba kaha kini karong 2019?

Nakapangutana ako niini tungod sa klarong fake news nga gipakatap diha sa Facebook kabahin sa usa ka advertisement sa Visayan Electric Company (Veco) sa usa ka subscriber nga nagpadayag og public apology nga gimantala sa SunStar Cebu.

Giilisan ang ngalan sa maong subscriber ug ang gibutang mao ang ngalan ni Kap. Michael Gacasan nga karon nidagan sa pagka konsehal.

Pagkabogo sa maong black propaganda kay sayon man kaayo kining masakpan ug mabisto nga fake news.

Gimantala sab sa Superbalita ang maong black propaganda kay dili man mosuporta kining mantalaan og fake news.

Apan nangangha ko dihang ang maong black propaganda nakailad og labing gamay duha ka kandidato alang sa pagka konsehal sa kaatbang nga partido. Gi-post pa gyud ginamit ang ilang tinuod nga Facebook account.

Ang nagsigig subay karon sa Maghisgot Kitag Politika Bay, makahibawo kon si kinsa kining mga gusto magpapili apan dali kaayong nailad og fake news unya ni-share ginamit ang ilang tinuod nga Facebook account.

Kining maong hitabo nakapahinuktok kanako kabahin niining dakong isyo nga pagkatap sa fake news dinhi sa Pilipinas ug sa tibuok kalibotan.

Maayo na lang kay tungod sa grabing pag-alma sa mga nahigugma sa kamatuoran, napugos ang Facebook sa paggukod na karon sa fake news.

Ang Facebook nga nahimo nang-distributor og impormasyon sa dugayng panahon nagdumili sa responsibilidad nga gatekeeper aron ang mahatod nga mga impormasyon, kadto ra untang mga tinuod.

Nakasabot lang sab ko sa ubang mga lider sa media nga tungod sa paninguha batok sa pagmugnag balaod nga mo-kontrolar sa pagmantala nga padulong na sa censorship, di sila gusto og dugang legislation kabahin sa fake news.

Alang kanako, mao gani kini ang rason nganong wala molihok ang kadagkuan sa media sa Sugbo batok sa CFR nga akong tawgon nga Cebu Fake Report (CFR).

Bisan pa man, nagka-anam na karon ang mga independenteng paninguha kabahin sa pagbonggo og mga fake news sama sa gibuhat sa Superbalita nga gimantala nga black propaganda ang gibuhat nga pagpakaulaw kang Kap Gacasan.

Tuod man, ang mga kandidato sa kaatbang nga ni-share sa maong fake news mao na ang nawad-an og kredibilidad ug nahimong kataw-anan.

Alang kanako, maayong magpadayon karong tuig 2019 kining maong trend alang sa kamatuoran aron ang mga kandidato magmatngon na ug di na magpakatap og fake news sa ilang pagpangampanya.

Malipayong Bag-ong Tuig Kanatong Tanan!

(@anol_cebu sa Twitter)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph