PATAY ang usa ka 43 anyos nga lalake human pusila sa wa pa mailhing mamumuno samtang naghantak sa may Abellana street, Barangay Suba, syudad sa Sugbo alas 6 sa buntag sa Lunes, Disyembre 31.
Ang biktima giila nga si Robert Pacana Hequillo, 43, taga L. Flores street, Barangay Pasil, siyudad sa Sugbo, kinsa nakaangkon sa pinusilan sa luyong bahin sa ulo.
Matod ni Chief Insp. Henrix Bancoleta, hepe sa Station 6 sa Cebu City Police Office nga samtang naghantak si Hequillo, kalit lang niabot ang wa mailhing mamumuno ug dayong pusil sa ulo ni Hequillo.
Patay diha-diha si Hequillo tungod sa samad pinusilan sa ulo sa wala pa matino nga kalibre sa armas.
Usa sa mga gitan-aw sa mga imbestigador, matod ni Bancoleta, ang personal nga atraso ug love triangle sanglit aduna kini gikarelasyon nga babaye nga matod pa uyab usab sa giingong gunman.
“Murag nigawas ron nga personal grudge or love triangle kay naa silay common nga babaye nga ilang giilugan ba, ang iyang uyab murag nauyab sa lain,” matod ni Bancoleta.
Wa pa silay nailhan nga suspek, apan aduna na silay saksi nga naa sa kustodiya sa Station 6 nga posibling makahatag na og hulagway sa nagbinugtong nga mamumuno. AYB