ANG gidaghanon sa mga nangamatay sa baha ug landslides dala sa bagyong Usman nisaka na ngadto sa 68 sa Mimaropa, Bicol ug Eastern Visayas regions, matod sa National Disaster Risk Reduction and Management Council (NDRRMC).
Sa ilang update sa Lunes, Disyembre 31, si NDRRMC spokesperson Edgar Posadas niingon nga 19 usab ka mga tawo ang gikataho nga missing samtang 12 ang nangaangol.
Tungod sa mga epekto sa Usman, ang mga lalawigan sa Camarines Sur, Sorsogon ug mga lungsod sa Polangui ug Bulan sa Albay gipangbutang sa state of calamity.
Mayoriya sa mga nangamatay sa mao nga mga dapit nagagumikan sa landslide tungod sa uwan.
Ang tropical depression Usman nga nisulod sa Philippine Area of Responsibility sa Pasko, nagdala og grabeng uwan sa wa pa moigo og una sa Borongan, Eastern Samar niadtong Sabado.
Labing minos 150 ka mga dapit ang gibahaan.
Ang NDRRMC niingon nga labing minos 130,000 ka mga tawo ang apektado sa 321 ka mga barangay sa Bicol ug Eastern Visayas region. SunStar Philippines