SUGOD sa Enero 3, sitahon na sa Land Transportation Franchising and Regulatory Board sa Central Visayas ang mga drayber nga masakpang nagmaneho og publikong mga sakyanan apan wa mopaubos sa Drivers’ Academy Training.
Ang training anha sa LTFRB 7 office ipahigayon.
Si LTFRB 7 Director Eduardo Montealto Jr. nitug-an nga gimandoan na sila sa ilang ulohang buhatan nga manakop og mga drayber nga wa moagi sa maong training apan nagmaneho og public utility vehicle (PUV), apan dili lang una niya kini ipatuman dinhi sa rehiyon, igo lang una nila sitahon ang mga drayber.
“Magsugod na mi og pangsita kon kinsa to ang wala makakuha pero, dili pa namo ma-implement nga i-penalize namo, mag-penalty mi kay sala pud sa amoa sa una,” pahayag sa director dihang nahinabi sa Superbalita Cebu pagka Lunes, Disyembre 31.
Siya nipasabot gamay ra ang lugar sa ilang opisina ug nahimo usab nga duha ka adlaw inay usa ang pagbansay sa mga drayber kay giapil og tudlo ang mga lagda ug ordinansa sa kagamhanan sa siyudad sa Sugbo kabahin sa trapiko.
Karon, matod niya, gihimo na lang nila nga usa ka adlaw ang training sa mga drayber ug gilahi ang bansay sa siyudad sa Sugbo kon dunay sobra sa oras.
Sa 28,000 ka mga prangkisa nga narehistro sa LTFRB 7 alang sa mga denomination sa mga bus pasaheroan, public utility jeepneys, taxis ug tourist buses, ang director nibanabana nga 30 porsyento na lang sa mga drayber niini ang wala pa mopaubos sa bansay.
Si Montealto niingon ang 28,000 maoy basehanan nila sa pag-ihap kon pila ang mga drayber nga nagmaneho dinhi sa rehiyon diin gibanabanang 80 porsyento niini naa sa Sugbo.
“Kana one is to one sa among franchise, 28,000 franchises tanan. Ang uban gud, naa may operator nga moapil (sa training), so, ma double count,” dugang sa director.
Ang pagsita sa mga drayber himuon nila sa mga operasyon nga ipahigayon sa Inter-Agency Council for Traffic (I-Act) uban sa Land Transportation Office ug Highway Patrol Group.
Sigon ni Montealto pamultahon og P5,000 ang operator sa PUV kon masakpan ang drayber niini nga nagmaneho nga wa moagi sa Drivers’ Academy Training.
Niadtong Disyembre 15 lang unta ang gihatag nga tagal sa ulohang buhatan sa LTFRB sa pagbansay sa mga drayber og PUV, apan gilugwayan kini hangtod sa miaging semana sanglit daghan pa sa Central Visayas ang wala pa mapaubos niini.
Sa unang hugna sa training, ipaubos ang mga drayber sa insaktong disiplina sa pagmaneho sama sa kinahanglan magsul-ob sila og uniporme samtang nag-drive, matinahuron sa mga pasahero, dili magpasagad og liko sa dalan ug motahod og pedestrian lanes.