MAS taas og 10% ang nabuthan sa pagsugat karong bag-ong tuig itandi sa gidaghanon sa nabuthan sa pagsugat sa bag-ong tuig niadtong 2018 sa Central Visayas.
Sa datus sa Regional Epidemiology and Surveillance Unit (RESU) 7 sa Department of Health (DOH) 7 ganinang alas 12 sa udto, niabot sa 50 ka mga tawo ang nabuthan sa Central Visayas itandi sa 45 niadtong 2018.
Kasagaran sa nabuthan anaa sa dakbayan sa Lapu-Lapu ug Sugbo diin tag-10 ang natala nga nabuthan, 7 sa Talisay, 6 sa Minglanilla, ug 4 sa Mandaue.
Tulo sa mga nabuhtan, aduna’y naputol sa lawas niini.
Nasayran nga labing bata nga nabuthan nagpangedaron og 2-anyos samtang 63-anyos ang pinakahamtung.
Nag-unang ning Piccolo nga gigamit hinungdan nga nabuthan, gisundan sa kwitis, triangle ug judas belt.
Aduna usa’y natala ang RESU 7 nga tulo ka biktima sa stray bullet. (HBL)