CALBIGA, Samar-- Usa ka sundawo ang gipusil sa usa ka sakop sa Citizen Armed Force Geographical Unit Active Auxilliary (CAA) sa Barangay 5 ning lungsod, pasado alas 4 Miyerkules sa kaadlawon, Enero 2.
Giila ang biktima nga si Private Anthon Balledo, ulitawo, nadestino sa 63rd Infantry Battalion, Philippine Army nga nakabase sa San Jorge, Samar.
Samtang ang suspek mao si Nelson Ocasla, sakop sa CAA, nadestino sa 4th WESCAA, Pinabacdao, Samar.
Ang igsuon sa biktima ang nisumbong sa kapulisan bahin sa insidente.
Base sa imbestigasyon sa kapulisan, gikan nanglakaw uban sa iyang mga amigo ang biktima.
Sa dihang padung na sila manguli, pag-abot sa Barangay 5, kalit niabot ang suspek.
Gipusil ang biktima gamit ang kalibre .45 nga pistola.
Nakaangkon og gamayng samad pinusilan sa ulo ang biktima kinsa dali gidala sa Calbiga Rural Health Unit apan gibalhin na sa Eastern Visayas Regional Medical Center.
Nasikop na ang suspek ug narekober gikan niini ang pistola nga gigamit nga dunay marka nga "Government Model Colt Automatic Caliber .45" ug dunay pito ka bala.
Padayun ang imbestigasyon sa kapulisan sa motibo sa pagpusil sa sundawo. (JKDP)