Kon aduna pay makit-an nga mga salin- salin nga pabuto sa New Year's eve, diha sa kadalanan, pahimangno sa kapulisan, ilabi na sa mga bata nga di nalang gyud kini puniton pa.
Human nga tulo sa 10 ka mga natala sa dakbayan sa Lapu-Lapu ug syudad sa Mandaue nga nabiktima sa pabuto atol sa pagsugat sa bag-ong tuig hangtud na sa unang adlaw sa tuig 2019, tungod kini sa gipamunit lang nga pabuto, diha sa dan.
"Mas maayo gyud nga di nalang manguryuso kalabot niining mga pabuto, ayaw na tawn ninyo na pamunita, naa gud gyuy mga kaso sauna nga after 6 days human sa pagsugat sa New Year, naa pa gihapon mabiktima sa pabuto tungod ana pagpamunit. Di gyud na kakompyansaan," pahimangno ni Police Senior Supt. Julian Entoma ang director sa MCPO.
Kini human nga duha sa 3 ka mga natala nga biktima sa pabuto sa syudad sa Mandaue, nahitabo alas 3, Martes sa hapon (Jan. 1) human nga 13 ug 11 anyos ang namunit og pabuto diha sa da'n sa barangay Casuntingan.
Hinuon minor injuries lang ang naangkon. Ang ikatulo nga nabiktima sa pabuto sa Mandaue City usa ka 6 anyos, human nga wa malabay dayon ang pabuto niadtong ala 1 sa kadlawon sa Enero 1.
Ang laing 7 sa nabiktuma sa pabuto ang gikan sa dakbayan sa Lapu-lapu, diin nagpanuigon og 30 anyos ngadto sa 9 anyos ang nakaangkon og minor injuries.
Matud ni Police Senior Supt. Limuel Obon, director sa Lapu-lapu City Police Office, nga wa gyud untay na-blotter sa ilang mga police station, hinungdan nga sila na mismo mga police ang nipakisayod sa mga tambalanan sa syudad.
Nasuta nga kasagaran sa mga nabiktima mao kadtong wa dayon malabay ang pabuto human gidagkutan, kwitis nga wa natarong paghikot sa kawayan, hinungdan nga didto napabuto sa silingan nga nagtan-aw.
Aduna tanan 14 ka mga biktima sa pabuto sukad niadtong pasko hangtud Martes, Enero 1, sa syudad sa Lapu-lapu.
Samtang mobalor sa 30 mil pesos ka mga pabuto ang nakompiskar sa kapulisan sa LLCPO sukad niadtong Disyembre 30 hangtud sa New Year's Eve.
Hinuon, gawas sa mga nabuthan sa pabuto, wala nay natala nga mga kremin ug bisan ginagmay nga insedente ang syudad sa Lapu-lapu atol sa pagsugat sa tuig 2019.
"Nakita nato nga disiplinado ang Oponganon, gawas lang atong kalabot sa paggamit sa pabuto. Siguro naminaw sila sa ato kanunay nga panawagan, inabagan sad sa LGU, sa kabarangayan. We can say that we are generally peaceful sa ato pagsugat sa New Year," gitug-an ni Obon sa Superbalita Cebu.
Samtang sa dakbayan sa Mandaue adunay natala nga duha ka insedente sa pagpanunggab. Una nahitabo pasado alas 6 sa Lubes sa gabii (Disyembre 31) sa barangay Alang-alang syudad sa Mandaue, ang biktima usa ka 17 anyos, samtang ang usa sa duha ka suspetsado menor de edad usab.
Giingong tungod sa panaglalis human mahubog ang hinungdan sa pagpanunggab.
Hinuon luwas ra ang biktima.
Pasado ala una sa kadlawon sa Enero 1 laing pagpanunggab usab ang nahitabo sa barangay Tipolo. Gamay nga samad dinunggaban sa iyang dughan ra hinuon ang naangkon sa biktima.
Gawas sa nahitabong pagpanunggab way mga dagkung insedente o kremin ang natala sa MCPO atol sa pagsud sa tuig 2019.
Gihulagway ni Entoma nga nagmalinawon sa kinatibuk-an ang dakbayan sa Mandaue.