GIPAHUGTAN karon ang seguridad sa habagatang bahin sa lalawigan sa Sugbo human mipagawas og travel advisory ang nasud sa United Kingdom (UK) pagpahimangno sa ilang nga likayan lang una ang pag biyahe sa maong dapit ug sa Mindanao.
Kini tungod sa nahitabong pagpamomba sulod sa South Seas Mall sa dakbayan sa Cotabato nga mikalas og duha ka kinabuhi ug miangol sa 34.
“Terrorist groups continue to plan kidnap operations against western nationals in the Philippines. This threat extends throughout the Philippines, both on land and at sea, but is particularly acute in the southern Philippines (Mindanao, Palawan and central Visayas, including Siquijor and Dumaguete),” tipik sa advisory sa nasud sa UK.
Si Senior Superintendent Manuel Abrugena, hepe sa kapulisan sa probinsya sa Sugbo, nagkanayon nga human mahitabo ang insidente sa Cotabato City mipagawas na dayon siya og kamandoan sa tanang hepe sa kapulisan sa kalungsuran nga pahugtan ang ilang pagbantay.
Ang mga dapit nga gipatutokan ni Colonel Abrugena, mao ang lungsod sa Badian, Dalaguete, ug Oslob diin daghang mga langyawng turista ang mubisita matag adlaw.
Gipasalig niya nga luwas pa ang probinsya sa Sugbo sa bisan unsa nga hulga sa terorista tungod sa pagtambayayong karon sa kapulisan ug kasundalohan.
Gawas sa mga pulis nga gipang deploy sa habagatang bahin sa probinsya adunay pwersa sa militar nga naa sa dapit nga mao ang Task Force Cebu.
“Nakipag ugnayan na rin tayo sa ating counterpart sa AFP (Armed Forces of the Philippines) sa intelligence community na mabigyan po tayo ng karagdagang impormasyon so that we can plan kung ano man po yung dapat pa nating gawin” matod ni Abrugena.
Niadtong Agusto sa miaging tuig ang UK mipagawas gihapon sa susamang advisory nga miisa usab ang kapulisan sa ilang alert status.
Masaligon si Abrugena sa publiko nga dali kining mutaho sa kapulisan kung adunay kadudahang tawo nga makita sa ilang palibot sama sa nahitabo sa Inabanga, lalawigan sa Bohol, duha ka tuig na ang nakalabay.
Nakig alayon na usab ang intelligence branch sa Muslim community sa probinsya aron pagsiguro nga dili sila malutsan sa mga teroristang grupo.
Giangkon niya nga sa pagkakaron walay direktang hulga nga nadawat ang kapulisan nga adunay pagpangatake nga himuon ang mga terorista sa Sugbo.
Apan bisan pa man niini wala mo kompyansa ang kapulisan nga maoy hinungdan nga ilang gipahugtan ang siguridad.
Adunay mga pulis ug sundalo nga nagbantay sa mga pantalan sa mga lungsod sa habagatang bahin sa probinsya sa Sugbo. (AYB)