Lamberto G. Ceballos
Cawayan, Dalaguete, Cebu
NAGTAMBO karong gabhiona sa bentana sa iyang lawak si Carmelo. Ang iyang panan-aw didto tugdon sa lagwerta sa atbang nga balay nga giliyukan sa kongkretong paril, sama sa iyahang balay.
Nakita niya ubos sa kahayag sa mga bombilya ang mga bata nga nanagpabuto og mga rebentador. Nasayod siya nga ang mga bata mga apo ni Veronica, usa ka biyuda ug nag-edad og singkuwentay-uno. Maguwang si Carmelo og duha ka tuig. Nasayod siya nga atua sa sulod sa ilang balay si Veronica, sa kusina, nangamdam og mga pagkaon alang sa Media Noche. Bisperas sa bag-ong tuig karong gabhiona ug ang tanang panimalay nag-andam alang madagayaaong pag-abot niini, puli sa daang tuig nga nagtikuko ug nagsungkod na (nga maoy larawan didto sa iyang hunahuna). Sa iyang bahin, biyudo na sab siya. Tulo na ka tuig nga mitaliwan si Divina tungod sa kanser sa utok. Dugay na silang managsilingan si Veronica ug ang bana niining si Marcial namatay sa aksidente sa dalan duha na ka tuig ang milabay. Ang awto nga gimaneho niya nadasmagan sa trak de karga ug DOA siya pag-abot sa ospital.
Klasmeyt sila si Veronica sa kolehiyo sa kursong BSC-Accounting. Nagkasuod sila. Nakapadayag si Carmelo sa iyang gugma kang Veronica sa katapusang semester sa tuig nga sila gitakda nga mo-gradwar. Gidawat ni Veronica ang iyang gugma ug nagmalipayon silang duha. Apan ang ilang kalipay naputol dihang si Veronica gidala sa iyang uyoan sa Manila aron adto didto mo-trabaho samtang nag-rebyu sa board exams alang sa certified public accountant. Si Carmelo nasulod isip accounting clerk sa usa ka shipping company dinhi sa Sugbo. Sa sinugdanan sige silang sinulatay ug tawganay sa long distance (wa pa mauso niadto ang selpon), apan sa paglabay sa pipila ka tuig naputol ang ilang komunikasyon. Nabalitaan na lang niya nga naminyo si Veronica kang Marcial, nga usa ka abogado. Usahay lagi ang kinabuhi may pagka siaw. Mibalik si Veronica sa Sugbo uban ang iyang bana ug usa ka anak nga lalake nga abogado sab si Treb. Sila ang nakapalit sa duha ka andana nga balay atbang sa kang Carmelo. Dunay bugtong anak nga babaye si Carmelo, si Ellen nga gradwado sa BS-Accontancy ug pasado pod sa CPA exams. Tungod kay managsilingan nagkasuod pod sila si Treb ug si Ellen.
“Tay, nakaandam na mi si Nang Nerry og mga pagkaon para sa Media Noche,” ni Ellen nga gikan sa kusina ug misulod sa iyang lawak. “Okey ra ka dinhi? Moadto na ko sa atbang.” Si Nerry katabang ni Carmelo sa balay.
“Sige, Day Ellen. Kami na lay bahala si Nerry dinhi,” hinay nga namulong si Carmelo.
“Ingon ra ba to si Mama Veron nga ipaimbitar ka nga adto sa ila ka mag-noche buena!”
“Nag-ingon siya ana, Day Ellen?” ni Carmelo nga mitutok sa iyang anak.
“Oo, uy! Hasta gani si Treb miingon nga dad-on ko ikaw didto karon. Adto ta, Tay!” ni Ellen nga nagpahiyom. “Ang mga bata sab gusto nga makighimamat sa ilang Lolo. Dugay na baya sila anga wa kakita nimo.”
“O, sige. Mokuyog ko nimo. Mag-ilis usa ko.”
Unya nabati sa tibuok palibot ang pagbudyong sa VECO pagka alas dose. Mikalit lang pagka alingisig ang tibuok palibot. Mipaka-paka ang mga rebentador ug ubang pabuto.
HUMAN sa ilang salo-salo sa Media Noche, didto sa gamayng lamesa sa terrace nagka-estoryahanay sila si Carmelo ug Veronica.
“Di gyud matagna ang palad sa tawo, no, Mel?” ni Veronica nga mitan-aw sa nawong ni Carmelo nga mitutok kaniya. Sa mga mata ni Carmelo naaninag niya nga matahom gihapon ang una niyang gugma.
“Mao gyud, Veron. Tan-awa lang si Treb ug si Ellen, atong mga anak. Sila ang nagpadayon sa nabugto tang gugma kaniadto,” ni Carmelo. “Pero, pwede man nga sumpayan nato ang atong kagahapon.” Gigunitan ni Carmelo ang mga kamot ni Veronica.
“Unsa may buot mong ipasabo, Mel?” ni Veronica nga mibawos paggunit sa kamot ni Carmelo.
“Bag-ong tuig ron. Banhawon ta ang daan tang gugma. Okey ka?” ni Carmelo.
“Okey! Ikaw baya akong first love. And first love never dies!” (Katapusan)