HAPPY New Year sa tanang sumosunod ug naghimo sa Superbalita nga sumpay sa inyong kinabuhi matag adlaw. Kumusta ang inyong pagsugat sa tuig 2019?
Dunay mga nagdagkot og fountain aron pagsugat sa New Year kay bawal lagi magpabuto sa dakbayan sa Davao. Naukay ang mga silingan nga wa mahibalo, nag-iyahay panghakot sa mga bililhon nga butang kay nagdahom nga nasunog ang pikas nga block sa naghuot nga kabalayan.
Akong silingan nag-New Year sa ospital tungod sa kalisang. Hangtud karon nagpabilin pa intawon sa tambalanan kay grabe ang kahimtang. Sorry! Maoy gipangayo sa kagawad kuno sa barangay nga maoy hinungdan.
Kon makasulti ang mga kritiko ni Presidente Rodrigo Duterte, daw wala nay maayo nga kaugmaon ang mga Pinoy ubos sa iyang administrasyon kay hilabihan kuno ang kalisud sa atong nasud.
Sa han-ay sa kahimtang sa mga nasud sa tibuok kalibutan naa sa ika-30 ang atong nasud.
Apan ang wa hisguti sa mga kritiko nga daghan pang kanasuran nga hilabihang kalisud. Mga pangulo sa laing kanasuran taas ang panglantaw sa pagdumala ni Presidente Digong sa atong nasud ug nagkonsidera nga sundugon ang iyang estilo pagsumpo sa krimen labi na ang pagsumpo sa ilegal nga druga.
Apan ang mga kritiko nga Pinoy wa ug dili jud mobilib kay alang nila tanang buhat ni Pres. Digong dautan walay pulos.
Sa pagsugat sa Pasko hangtud sa Bag-ong Tuig, hilabihan pagkunhod sa mga biktima sa pabuto. Walay usa nga gikataho nga nabuthan sa dakbayan sa Davao.
Mahimo diay kon duna lay “political will” ang pangulo ug usa kini sa kahimoan ubos sa Duterte administration nga gipasagdan sa milabay nga namunoan sa nasud.
Sa mga nagpabuto ug nangasamad basin naleksiyon na mo ug nakaingon nga di nako mousab. Tagam kay gahi mo'g ulo!
Atong panghinaut nga mas lig-on na ta karong tuig 2019 nga mosugat sa mga hagit sa kinabuhi. I-apil ang pagpangaliya nga ubanan ug giyahan ta sa labaw'ng Makagagahum ug hatagan ta'g maayong panglawas.
Dugangi ang paningkamot ug ayaw pagsalig sa mga lingin nga prutas nga imong giandam nga pasuwerte alang sa 2019. Hinumdomi ang sulti sa Ginoo nga “Lihok tawo kay tabangan ko ikaw.”