COTABATO CITY -- Gimugna ang usa ka special task group sa nahitabong pagpamomba sa dakbayan pila ka oras una ang Bag-ong Tuig.
Gibutyag ni Police Regional Office 12 director Eliseo Rasco nga iyang gimando ang pagmugna sa Special Investigation Task Group South Seas nga maoy manguna sa imbestigasyon sa insidente.
Kahinumdoman nga mibusikad ang improvised explosive device (IED) atubangan sa South Seas Mall sa dalang Magallanes, Cotabato City.
Duha ka tawo ang namatay nga giilang sila si Jonathan Tasic Torribiano ug Mariam Cali samtang laing 34 ang naangol.
Gihulagway nga IED gama sa mga lansang, black powder ug cellphone isip triggering mechanism.
Gituohang grupo sa Dawlah Islamiyah ug Bangsamoro Islamic Freedom Fighters ang gitudlo nga suspek sa pagpamomba.
Samtang gikondena sab ni Moro Islamic Liberation Front chairman Aljads Murad Ibrahim ang hitabo ug naghangyo sa mga awtoridad nga tutukan ang imbestigasyon niini.
Nanawagan sab si Mayor Cynthia Guiani Sayadi sa katawhan sa dakbayan nga igmaton ang ilang kaugalingon ug likayan ang paghimo og istorya nga mopasamot lang sa sitwasiyon ug huwaton na lang ang resulta sa gihimong imbestigasyon. (Edgar E. Fuerzas)