KON makapagamay ang swimming, explain butanding.” Mao ni kanunay nako na ikomedya sa mga higala nga moingon nga makapaminos kuno sa timbang ang paglangoy. Diay mananap nga nag-swimming tibuok niyang kinabuhi, dako lang gihapon.
Ug pun-an pa ni nako sa pag-ingon nga ang butanding (whale shark) isda nga nag-diet. Sa iyang kadako, pagkagagmay sa iyang pangkan-on. Magtuo ka nga ang iyang pangkan-on iho, okoy, serena, barko, mga turistang Amerkano. Diay to, ang iyang tirada plankton, kanang tapok sa mga gagmayng organism sa dagat, ug itlog sa isda. Pagkadako sa baba, itlog sa isda? Apil sab sa iyang menu ang mga crab ug pasayan nga pwerte pang gagmaya wa pa intawon ka-graduate sa elementary.
Makaingon ta nga naninguha intawon ang butanding nga mogamay kay tingali grabe na ang bullying nga iyang nasinati.
Nahinumdom ko ani sa miaging semana. Nangadto mi ni misis ug mga bata sa Oslob aron mag-whale watching. Nagpanagana mi pirmiro kay ingon among mga environmentalist friends nga makadaot kuno ang whale watching sa mga butanding. Ma-stress kuno ang mga butanding, ma-depress, maapektohan ilang lovelife hangtod magbuwag, dayon maminaw na lang og mga kanta sa Air Supply samtang maghilak hangtod mamatay.
Apan misalig mi sa mga lakang nga gihimo sa nagduma ini nga tourist attraction aron maprotektahan ang mga butanding. Usa na ini ang pag-limit sa gidaghanon sa mga turista nga mobisita. Alas 11 pa lang sa buntag, wa nay turista nga gidawat.
Akong kwenta, mga 300 ra mi tanan nga gipasulod. Di sama kaniadto nga way limit, hangtod manakit na lang kuno ang apapangig sa mga butanding sa sigeg smile sa mga selfie sa mga turista.
Usa ka oras ming nag-utaw-utaw sa dagat pipila lang ka metros gikan sa baybayon sa Barangay Tan-awan, Oslob. Ug tuod man, wala mi sipyata sa mga butanding. Kapila sab sila nagpakita, labi na kay sabwagan man silag pasayan o uyabang sa mga nagduma didto.
Pwerteng lingawa sa akong mga bata nga di papugong mopaduol gyod sa mga butanding. Nalipay na lang pud ko kay maayo sab nga masuod sila sa ingon ini kadako nga mga mananap.
Kay ang tinuod ra ba--milingi ko sa akong asawa, mitan-aw ko sa akong nagkadako nga tiyan, nakahunahuna ko sa tanan nakong higala nga walay diet nga nakatabang--mabutanding ra tang tanan.