GISUGAT og negatibong publisidad ang pipila ka dapit sa Pilipinas lakip na ang kasadpang bahin sa Sugbo sa pagsugod ning bag-ong tuig 2019.
Kini human nga sa niaging adlaw miluwat ang United Kingdom ug pasidaan ngadto sa ilang kataginasod kalabot sa pagbiyahe sa Mindanao area ug sa Central Visayas tungod sa sunodsunod nga engkuwentro tali sa grupong terorista ug sa tropa sa gobiyerno.
Usa sa ilang gibasehan mao ang nahitabong pagpamumba sa shopping mall sa Cotabato City diin duha ang patay diha-diha gilayon ug laing 34 ang mga nangaanol.
Sa ilang pasidaan, ilang gitumbok nga ang mga grupo sa terrorista adunay igong kapabilidad nga moataki sa bisan asang dapit sa nasod ug sa bisan unsang orasa.
Apil na niini ang mga lugar nga hugpaan sa mga langyaw, mga tugpahanan ug mga pampublikong lugar.
Sa Central Visayas ug Mindanao gituohan nga ang mga terrorista molusad og mga pagpangdagit ug gikataho nga ang mga Western nationals maoy nag-una sa ilang target, dugang sa travel advisory.
Sa usa ka national television interview sa niaging buwan, si Joma Sison, ang founder sa Communist Party of the Philippines, subling mipadayag nga ang 2019 maoy tuig nga ilang mapalagpot si Presidente Rodrigo Duterte sa katungdanan.
Buot ipasabot nga molusad usab ang CPP/NPA og mga pagpang-ataki batok sa gobiyerno ug sa administrasyon.
Ang gipamulong ni Sison maoy tubag sa sayong pamahayag sa presidente nga ang mga komunistang pundok mabanlas na usab karong tuiga.
Laing sagubangon sa nasod ning 2019 mao ang pagpuo sa pagdagsa sa mga ilegal nga drugas sa nasod, sigon ra usab sa gisaad ni Duterte.
Kini maoy atong atngan sa pagtaak sa 2019.