NAKATALA ang Department of Health (DOH) og pito ka indibidwal ang nabuthan sa kasaulogan sa Pasko ug Bag-ong tuig sa Northern Mindanao.
Matud ni Dr. Dave Mendoza sa DOH- Northern Mindanao nga lima ang natala sa dakbayan sa Cagayan de Oro samtang usa sa Misamis Occidental ug laing usa sa probinsya sa Bukidnon.
Aduna pa silay gipang beripika nga laing tulo apan wala pa kini natala sa pagkakaron.
Si Police Superintendent Surki Sereñas, tigpamaba sa Police Regional Office- Northern Mindanao, niingon nga mapasalamaton gihapon ang pwersa sa kapulisan tungod walay mga dagkong panghitabo ang napatik sa pagsugat sa Bag-ong Tuig.
Gawas niining mga nabuthan sa pabuto, nga pulos anaa na sa luwas nga kahimtang, wala na gyud gihulagway niini nga grabe ang sitwasyon.
Natala sab ang gituohang samdan sa stray bullet ang gikareport sa dakbayan sa Iligan diin ang biktima giila nga si Lenny Bado, 48, taga Purok 1, Diamond Extension, Barangay Hinaplanon.
Nakaangkon ang biktima og samad sa iyang likod ug kasamtangan nagpaalim sa ospital sa maong dakbayan.
Wala hinuon natala nga mga susamang insidente sa probinsya sa Camiguin, Lanao del Norte, ug Misamis Oriental.
“We are attributing this remarkable record to the good people of Northern Mindanao who did not fire their firearms and were responsible merry-makers as we welcomed 2019,” pasalamat ni Police Regional Director Police Chief Superintendent Timoteo Pacleb.
“The entire holiday season was generally peaceful and this is something we should be proud of,” Pacleb matud niini.
Sa pagkakaron hugot ang ilang pag-alerto human sa pagpamomba nga natigayon atol sa Bag-ong Tuig sa Cotabato.