MGA business establishments sa dakbayan sa Mandaue ang gi-discourage ni Mandaue City Police Office director, Julian Entoma, sa di gyud pagpahigayon og street party, sa panahon sa Sinulog.
Samtang paghatag og security permit, first-come, first- served basis, diin usa lang sa matag gabii.
Sa na-obserbaran sa pipila na ka tuig, nga bisan kon sa dakbayan sa Sugbo ang pagsaulog sa kapistahan sa Sr. Sto.
Nino, apan ang pagdagsa sa mga tawo aron sa pagsaulog sa Sinulog, kasagaran moabot sa dakbayan sa Mandaue.
Gani pipila ka mga balay patigayon sa syudad sa Mandaue ang mohimo’g nagkadaiyang klase sa party sa niaging mga tuig.
Apan alang karong nga Sinulog, rekomendasyon sa kapulisan sa MCPO nga wa’ nalang unta himuon nga street party sa dakbayan.
Kini aron kalikayan ang mga nagkadaiyang kremin, disgrasya ug mahimo nga lugar alang sa mga ilegal nga patigayon, sama sa pagbaligya og ilegal nga drugas, party drugs sama sa ecstasy.
First-come-first-served basis usab ang paghatag nila og security permit alang sa mga establisemento nga buot mopahigayon og party su’d sa ilang compound sugod karong Enero 11 ngadto sa 17. Ang unang 7 ka mga adlaw atol sa pagpahigayon sa nobenaryo sa kapistahan sa balaang bata.
Usa lang matag gabii ang hatagan nila og permit, kini aron matutukan gyud sa kapulisan. Sa maong permit, nagpasabot kini nga adunay i-detail nga mga pulis, sa lugar nga adunay party, gawas sa security personnel sa establisemento.
“Kon mohimo sila og nightly affair, pagsugod pa lang sa nobenaryo, so be it, pwede pa namu mahatagan, di lang namu gusto masabayan ang sa traslacion hangtud na sa sinulog grand parade. Pwede ra mi mo-approve sa 1st night til 7th night, mas okay nay indoor, gi-discourage namu ang street party, kay sa miagi gud amo nakita, dinhi sa Mandaue nga naay street party, dire nuon nakakuha og mga ecstasy,” gipasabot ni Entoma.
Di na usab sila mohatag og permit sa Enero 18 hangtud sa 20, nga mao ang mga adlaw sa kasaulugan sa pyesta.
Gawas lang sa City Time Square nga daan na nikuha og permit niadto pang Disyembre 15, kinsa mopahigayon og concert sa ilang compound sa Enero 19, bisperas sa Sinulog grand parade.
Diin limited ra usab ang mga tawo ug nga gipasiguro nga di gyud moabot sa da'n ang mga mosaksi ug mosalmot sa konsyerto.
Dugang ni Entoma, kini aron usab di kaayo mahago ang kapulisan, kinsa sugod pa lang karong Enero 9 full alert na.
Wa’y augmentation sa ilang pwersa ug gani ang uban sa ilang mga pulis ang posible ma-re-assign sa dakbayan sa Sugbo, pagtabang sa seguridad, nga gipanlantawan nga minilyon ka mga deboto, mamistahay ug turista ang modagsa.
Ug iyang giklaro nga di gyud niya pahilabtan ang ilang mga police nga alang sa mga anti-criminality ug anti- illegal drugs operation.
Gipanlantawan na ni Entoma nga sa dakbayan sa Mandaue ang kasagarang dagsa sa mga party-goers nianang nga panahuna.
Ang security permit ang usa sa kinahanglanon aron usab makakuha ang usa ka establisemento og Mayor’s permit alang sa pagpahigayon og kalihukan, atol sa Sinulog.
Laing mohatag og pagtugot o rekomendasyon una mopagawas og permit ang mayor ang gikan usab sa Bureau of Fire Protection ug sa City Disaster Risk Reduction and Management Office.
Kahinumduman nga sa niaging tuig nga Sinulog, 3 ka mga balay patigayonsa Mandaue City ang napasirad-an, human nihimo gyud og mga party bisan way pagtugot sa mayor.