SUPERBALITA CEBU

Pagpatuman sa no standing policy sa bus mas gi-estrikto na

SunStar file

MAS giestrikto og patuman sa mga awtoridad ang no standing policy sud sa mga bus pasaheroan nga magbiyahian sa Central Visayas.

Ang operator sa bus nga masakpan nga makalapas niini pamultahon og P5,000 sa unang paglapas ug magkadako ang multa kon masakpan og balik.

Si Eduardo Montealto Jr, regional director sa Land Transportation Franchising and Regulatory Board (LTFRB) 7, nibutyag nga dugay na kini nga kamandoan sa ilang ulohang buhatan sukad pa niadtong 2005.

Apan mas giestrikto nila ang pagpatuman niini human sila nakamatikod nga daghang mga bus ang makalapas niini labi na kon dunay dagkong mga okasyon sama sa Pasko, Bag-ong Tuig, Semana Santa o adlaw sa mga kalag ug mga santos diin magdasok ang mga pasahero.

Si Julie Flores, presidente sa Cebu Provincial Bus and Mini Bus Operators Cooperative, ninghangyo sa LTFRB ug Land Transportation Office nga hatagan sila og konsiderasyon labi na kon panahon sa tingsakay sama sa Pasko ug adlaw sa mga kalag.

Matod niya, kon mahimo i-limit sa 10 ka mga pasahero ang tugotan nga makabarog sud sa bus, aron duna pud gamay nga extra income ang ilang mga sakyanan.

Hinuon, alang niya, ang nakabentaha kon minos ang mga pasahero nga magbarog, kay makadaginot sila sa maintenance sa mga sakyanan kay dili bug-at ang load niini.

Siya nihangyo nga ikonsulta una sa mga pasahero ang higpit nga pagpatuman sa maong lagda.

Apan alang ni Montealto, dili kini mahimo kay dili sila gusto mabutang sa kompromiso ang kaluwas sa mga pasahero samtang nagsakay og bus.

Sa habig sa Vallacar Transit, ang nagdumala sa mga Ceres Bus, sumala ni Rodney Santarin, operations manager sa kompaniya, nga dugay na sila nagtuman sa pagdili sa mga pasahero nga magbarog.

Apan siya niangkon panahon nga tingsakay dili malikayan nga duna gihapoy mga pasahero nga magbarog tungod kay gusto makauli sa ilaha.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph