Serna: Bulahang bag-ong tuig kanatong tanan!

Ingon ana gyud ang atong pagtan-aw sa tuig nga bag-o lang nagsugod. Kinahanglan positibo ang atong panglantaw aron nindot usab ang mga butang nga moabot sa atong kinabuhi.

Di ikalimod nga kitang tanan nag-antos, nagsangki-ig sa niaging tuig tungod sa mga katalagman nga niabot labina gyud sa corona virus nga hinaut pa unta, matagbaw na sa iyang pagki-at ug pagrampa sa tibuok kalibutan ug mobalhin na sa planetang Mars, Venus o sa adlaw ba kaha aron mapagtong siya didto.

Kita nga nakasugakod ug ni-agwanta sa mga pagsulay, maningkamot lang pod nga mo-umento ang atong kinabuhi sa bisan unsang paagi.

Nisugod na man ta pagka plantito ug plantita, ato kining ipadayon.

Kon may mosulod nga kwarta tungod sa pagbaligya og mga tanom, labing maayo.

Kon gamay ra o wala gyud, mangita kitag paagi nga makakita kitag wawarts nga ikasustenir sa adlaw-adlaw natong panikaysikay.

Matud sa mga mananagna, mas maayo ang tuig 2021 kay sa niaging tuig. Magdala kuno kinig paglaum ug kadasig.

Maghatag usab kuno kinig bag-ong panglantaw ug panghunahuna gawas nga makadala usab kinig kadasig sa katawhan aron molihok alang sa kahi-usahan sa mga nasud sa tibuok kalibutan.

Kanindot kon matuman. Ang katumanan hinoon ning maong panagna nagkinahanglan usab sa atong pakigtambayayong kay kon di ta moapil ug moamot og kusog, oras ug mga ideya, wa ra gihapoy mahitabo.

Nindot ang pagpanamilit ni Giselle Sanchez sa tuig 2020 kay nakalangkat siyag korona isip Noble Queen of the Universe International 2020 sa usa ka online pageant nga gipahigayon niadtong Miyerkules, Dis. 30.

Ang ubang mananaug mao si Megan Camaisa sa Southern California, USA, isip Noble Queen of the Universe 2020, Aditi Aduja sa India isip Noble Queen Globe 2020, Janeen Streetman sa West Coast, USA isip Noble Queen Tourism 2020 ug Rhonda Swan of USA Mainland isip Noble Queen Earth 2020.

Mga pahalipay! Feeling close. Haha!

Human sa duha ka tuig, naka-bonding na usab nako ang Asec nga si Jonji Gonzales, iyang misis nga si Anne Rhoda ug ang iyang mga anak nga sila si Ralph ug Rigo.

Nibakasyon ang pamilya uban sa mga ginikanan ni Asec Jonji, duha ka igsoon ug ilang pamilya ug pila ka mga higala diri sa usa sa mga resort sa akong lungsod nga natawhan sa Oslob.

Laing higala, si Johnie Lim ug Flor, nga nakahibawo sa pagbakasyon nila ni Asec Jonji ug Rhoda, lagmit manglayat usab inig human sa bag-ong tuig.

Related Stories

No stories found.
SunStar Publishing Inc.
www.sunstar.com.ph