NAGPULIKI nga mga skedyul sa Sugboanong Olympian marathoner nga si Mary Joy Tabal karong tuiga uban sa iyang tinguha nga makahulbot na usab og lingkuranan alang sa 2020 Olympic sa Japan ug makadepensa sa iyang titulo sa Southeast Asian (SEA) Games.
Apan taliwala niining tanan, positibo si Tabal nga makab-ot ra gihapon niya ang iyang mga tinguha.
“It’s a continuous process for us because it’s not only about SEA Games and I know that 2019 will be busier for me because I’m planning to qualify again for the Tokyo 2020,” matod sa 29-anyos nga Tabal nga nakutlo-an sa sa Rappler.
Ang 2017 SEA Games marathon champion nakatikang na og ang-ang alang sa SEA Games human sa makausa pa iya na usab nga gidominar ang 42nd Milo Marathon National Finals sa niaging Disyembre nga maoy iyang ikaunom nga sunodsunod nga titulo.
Niini siya ang gihatagan og katungod nga mo-represent sa nasod sa SEA Games.
Kini maoy ikatulong higayon sa SEA Games ug iyang giangkon nga gibati niya ang pressure sa pagdepensa sa titulo ug ilabi na kay host ang nasod karong tuiga.
Lakip sa gipangandaman ni Tabal mao ang 2019 Tokyo Marathon nga gikatakda karong Marso 3 nga magsilbi usab niyang trial alang sa 2020 Olympics. (JBM)