LAB-AS pa man tuod sa iyang ikaupat nga division world title, target karon ni Donnie “Ahas” Nietes sa ALA Boxing Gym nga ikasangka ang usa sa inilang boksidor sa tibuok kalibutan nga si Roman Gonzalez.
Sa press conference kagahapon sa St. Mark Hotel, mipadayag nga dugay na gyud niyang damgo nga makontra si Gonzales ug siya nagtuo nga kini maoy makahatag og dakong lingaw sa mga boxing fans.
“Ako gyud na nga damgo,” matod sa 36-anyos nga Nietes kinsa nahitapo na karon nila ni Manny Pacquiao ug Nonito Donaire Jr. sa mga Elite Filipino fighters nga bugtong nakahupot og upat ka world title sa managlahing division.
Niadtong bisperas sa Bag-ong Tuig, gipildi ni Nietes ang three-division world champion ug Japanese star nga si Kazuto Ioka didto sa Wynn Palace Cotati SA Macau pinaagi sa split decision aron angkunon ang bakanting WBO Superflyweight title.
Sa kadaugan, ang lumad nga taga Murcia, Negros Occidental pabilin nga wala pay pildi sulod sa 14 ka tuig ug naghupot sa record nga 42-1-5 nga gilamasan og 23 ka knockouts.
Nanghinaot si Nietes nga ning higayona mahatagan na og katumanan ang iyang laing pangandoy nga maoy ang pagpakigbatok ni Gonzales.
“Nindot ni nga away. Agresibo man siya (Gonzales), unya ako counter puncher. So, haom kaayo ang amon nga style,” dugang ni Nietes.
Ang Nicaraguan nga Gonzales, usa usab ka four division champion, naghupot usab og record nga 41-2, 39 knockouts ug sa kasamtangan no. 2 sa WBC ug no. 5 sa WBA superflyweight.
Siya usab ang kanhi pound-por-pound king.
Ang trainer ni Nietes nga si Edmund Villamor, mipasabot nga hayag ang posibilidad nga maagni si Gonzales sa hagit ni Nietes tungod sa titulo.
Samtang ang headcoach nga si Edito Villamor nagtuo nga bisan og 36 anyos na si Nietes, dako pa kaayo kini og ikabuga sa iyang boxing career tungod sa pagka disiplinado niini.
Si Nietes sa iyang bahin, mipadayag usab nga kon ang ubang mga boksidor nakaaway pa sa edad nga 40 anyos, posibli nga mahimo usab kini kaniya.
Sa kasamtangan, si Nietes padayon karong nga nagselebrar sa iyang kadaugan. (JBM, RSC)