BISAN pa man og gi-boo sa mga fans sa Los Angeles, pabilin nga nagmainiton si Paul George ng mipugnit kini og 37 puntos aron ituboy ang Oklahoma City ngadto sa 107-100 nga kadaugan batok sa Lakers sa National Basketball Association (NBA) kagahapon.
Si Westbrook, sa makausa pa, nakahulma na usab og triple-double pinaagi sa pagpatik og 14 puntos, 16 ka rebounds ug 10 ka assists, apan si George nga sama kaniya lumad nga taga Southern California maoy nahimong sentro sa atraksiyon sa bugtong pagbisita sa Thunder sa Los Angeles sa karon nga season.
Sayo nga gi-boohan si George kansang sala mao ang desisyon nga mopirma sa OKC bisan pa man sa haylo sa Lakers sa dihang nahimo kining free agent.
Tataw nga gikasagmuyo sa mga fans sa Lakers ang wa pagpakighinabi ni George sa mga kadagkuan sa team lakip ni Magic Johnson kinsa naglaom nga makaduwa siya sa iyang kaugalingong gigikanan nga ikauban si LeBron James.
Si James igo lang nagtan-aw sa duwa diha sa bench sa Lakers nga wa mag-unipormi ug padayon pang nagpaalim sa pagpanakit sa iyang bugan.
Wa pa mohatag og katinuan si coach Luke Walton kon kanus-a makabalik si James og duwa.
Si Kyle Kuzma wa na sab makasulod sa second half tungod sa pagpanakit sa buko-buko niini. Igo lang kining mitapos sa duwa nga may kuwatro puntos.
Samtang ang triple-double nga nahimo ni Westbrook maoy iyang ika-115 nga triple-double performance sa iyang career ug ikawalo sa karon nga season.
Sa ikaupat nga higayon, wala na usab makaduwa si Rajon Rondo ug sama kang James naglingkod kini sa bench nga wa makaunipormi tungod sa iyang angol sa tudlo.
Si Kentavious Caldwell Pope nga may 25 puntos, 18 niini sa first half, aron pangulohan ang Lakers kinsa adunay 1-3 nga record nga wala si James.
Ang Thunder mosulong sa Portland ugmang adlawa samtang ang Lakers mo-host sa New York Knicks.
Samtang sa laing bahin, ang Philadelphia Sixers misandig sa 42 puntos ni Joel Embiid, 30 niini sa first half, ug 18 ka rebounds aron buntogon ang Phoenix Suns, 132-127.
Midugang og 29 si Ben Simmons, 27 gikan kang J.J. Redick alang sa Philadelphia nga miduwa nga wala si Jimmy Butler.
Nangulo sa pagsawop sa Suns si Devin Booker nga may 37 puntos midugang og 18 puntos ug 11 ka rebounds si Deandre Ayton.
Gipukan sa Washington Wizards ang Atlanta Hawks, 114-98, Brooklyn Nets mibaling sa New Orleans Pelicans, 126-121.
Gilubong sa Boston Celtics ang Minnesota Timberwolves, 115-102; gibalian og sungay sa Orlando Magic ang Chicago Bulls, 112-84.
Gilupig sa Detroit Pistons ang Memphis Grizzlies, 101-94. (JBM)