ANG sunog sa Metro Ayala niadtong Enero 2018 mao ang usa sa labing dakong natampo nga nisaka og P1.1 bilyones ang natala nga danyos sa sunog sa 2018 itandi sa P100 milyones lang niadtong 2017.
Sa labing uwahi nga datus sa Bureau of Fire Protection (BFP) 7 sa mga sunog niadtong 2018,wala pa’y labot ang buwan sa Disyembre, niabot sa P1,114,831,891 ang kantidad sa danyos sa 1,011 ka mga sunog sa Central Visayas.
Labing daghang natala nga sunog sa rehiyon sa lalawigan sa Sugbo diin 550 kini ka insidente gikan Enero hangtod Disyembre ug P1,058,923,805 ang kinatibuk-ang danyos gikan Enero hangtod Nobiyembre 2018.
Mas taas usab kini og 13% itandi sa 474 ka insidente sa 2017 diin niabot lang sa P81 milyones ang danyos nga natala.
Sumatotal nisaka og 38% ang mga insidente sa sunog sa rehiyon kon itandi ang insidente sa 2018 ug 2017.
Aduna’y sumatotal 622 ka mga sunog sa rehiyon niadtong 2017.
Apan wala pa malakip ang Negros Oriental sa 2017 nga datus tungod kay kaniadto lakip pa kini sa Negros Island Region (NIR).
Sa Enero niadtong 2018 natala ang labing dako nga danyos sa sunog sa rehiyon diin sa Sugbo palang nagkantidad na kini og P805 milyones.
Nasayran usab nga labing daghang insidente sa sunog sa 2018 ang buwan sa Agusto diin niabot kini sa 160: 82 sa Cebu; 61 sa Bohol; 13 sa Negros Oriental; ug tag duha sa Siquijor ug Lapu-Lapu City. (B)