MAS giestrikto og patuman sa mga awtoridad ang no standing policy sud sa mga bus pasaheroan nga magbiyahian sa Central Visayas.
Ang operator sa bus nga masakpan makalapas niini pamultahon og P5,000 sa unang paglapas ug magkadako ang multa kon masakpan og balik.
Si Eduardo Montealto Jr, regional director sa Land Transportation Franchising and Regulatory Board (LTFRB) 7, nibutyag nga dugay na kini nga kamandoan sa ilang ulohang buhatan sukad pa niadtong 2005.
Matod niya, hugot nga gidili ang pagpabarog og mga pasahero sa mga bus nga molapas og 15 ka kilometros tungod kay delikado kini maaksidente ug maisip nga usa ka kalapasan sa overloading.
“Dili ta gusto i-compromise nato ang safety sa mga pasahero. Magtindog man gud unya layo ang biyahe basin og makatulog, makabuhi unya magkalit og liko, na matumba, lisod na,” pasabot ni Montealto dihang nahinabi sa Superbalita Cebu niadtong Huwebes, Enero 3.
Apan mahimo ra ang binarugay sa mga pasahero kon mugbo ang biyahe sama sa modernong mga jeepney nga Beep nga otso kilometros lang ang labing layo nga biyahe.
Sigon sa director niadtong Nobiyembre giestriko ang pagpatuman niini ug mas gihigpitan sugod niadtong Disyembre 22 subay sa Oplan Biyaheng Ayos Pasko labi na human matukod ang Inter-Agency Council on Traffic (I-Act) uban sa Land Transportation Office ug Highway Patrol Group.
Mas giestrikto nila ang pagpatuman niini human sila nakamatikod nga daghang mga bus ang makalapas niini labi na kon dunay dagkong mga okasyon sama sa Pasko, Bag-ong Tuig, Semana Santa o adlaw sa mga kalag ug mga santos diin magdasok ang mga pasahero.
Sumala ni Montealto bisan sa mga roro nga barko kay duna na usab sakay nga ilang mga operatiba aron maseguro nga nituman niini ang mga bus nga motabok og laing isla, gawas sa Sugbo.
Si Julie Flores, presidente sa Cebu Provincial Bus and Mini Bus Operators Cooperative, ninghangyo sa LTFRB ug LTO nga hatagan sila og konsiderasyon labi na kon panahon sa tingsakay sama sa Pasko ug adlaw sa mga kalag.
Matod niya, kon mahimo ilimit sa 10 ka mga pasahero ang tugotan nga magbarog sud sa bus, aron dunay gamay nga dugang income ang ilang mga sakyanan.
Hinuon, alang ni Flores, ang nakabentaha kon minos ang sakay nga mga pasahero kay makadaginot sila sa maintenance sa mga sakyanan kay dili bug-at ang load niini.
Ang konsehal sa kagamhanan sa lungsod sa Barili nihangyo sa LTFRB nga ikonsulta una sa mga pasahero kon uyon ba kini sa higpit nga pagpatuman sa maong lagda.
Apan alang ni Montealto, dili kini mahimo kay dili sila gusto mabutang sa kompromiso ang kaluwasan sa mga pasahero samtang nagsakay og bus.
Ubos sa Republic Act 4136 kun Land Transportation and Traffic Code ug Joint Administrative Order (JAO) 2014-01 hugot nga gidili ang overloading sa mga publikong sakyanan sama sa bus.
Sa habig sa Vallacar Transit Inc., ang nagdumala sa mga Ceres Bus, sumala ni Rodney Santarin, operations manager sa kompaniya, nga dugay na nagtuman ang ilang 200 ka bus units sa amihanan ug laing 200 ka bus units sa habagatan sa pagdili sa mga pasahero nga magbarog.
Apan siya niangkon panahon nga tingsakay dili malikayan nga duna gihapoy mga pasahero nga magbarog tungod kay gusto makauli sa ilaha.
Si Balbino “Ka Bino” Guerrero, night shift supervisor sa Cebu City Public Library, sa iyang post sa iyang Facebook account nagpakita nga duna pa gihapoy nagbarog nga mga pasahero sa iyang gisakyan nga Ceres Bus niadtong Huwebes sa hapon gikan sa Liloan, Santander paingon sa siyudad sa Sugbo. (B)