Layo pa gani ang kampanya alang sa mga lokal nga kandidato pero kon imong paminawon ang mga politiko dinhi sa atong dakbayan Davao, daw nagsugod na ang kampanya. Mga hait ug sakit nga mga isyu ang atong mabati gikan sa duha ka kampo, gikan sa Hugpong sa Tawong Lungsod ug gikan sa team Nograles.

Isig akusahay nga trapo kuno nga politiko. Sa atong patas nga paglantaw wa may politiko karon nga dili trapo. Matud pa sa kampo sa Hugpong sa Tawong Lungsod, trapo kuno nga politiko si House Speaker Prospero "Boy" Nograles tungod kay matag proyekto niini nga gi-implementar adunay karatola nga siya ang ang nagpasiugda.

Gipang-angkon kuno, nga ang kuwarta nga gigasto niini iyaha man sa atong gobyerno.

Samtang sa pikas nga kampo sa Hugpong sa Tawong Lungsod, ila usab nga nakalimtan nga nangangkon usab sila og kuwarta nga gikan sa atong gobyerno. Sa dili pa magsugod ang programa kada Dominggo, "Gikan sa Masa Para Masa", dunay report gikan sa City Press Office, ug matud sa voice over, gihatagan ni Vice mayor Inday Sara Duterte, o gihatagan ni Mayor Rody Duterte og mga materyal ang mga kabarangayan sa atong siyudad agi'g tubag sa ilang problema.

Sa atong yano nga pagsabot, pareho ra silang nag-angkon sa nahisgutang proyekto nga ang kuwarta nga gigasto gikan sa panudlanan sa atong gobyerno. Ang deperensiya lang kang House Speaker Prospero "Boy" Nograles makita kay karatola man, samtang sa atong lokal nga gobyerno dili makita kay dole out man.

Sa tinuod lang, wa may politiko bisa'g asa ka sa Pilipinas nga mogasto og iyang personal nga kuwarta aron gastuhon sa proyekto sa gobyerno.

Kining tanan nahulog og binata nga isyu. Kon mahimo unta kadtong mga desenting isyu maoy inyong lantugian aron dili ta mauwaw sa mga intelehenting mga botanteng Dabawenyo.

Ang kuwarta man god sa atong gobyerno dili na mahimong proyekto kon walay tawo nga nag-initiate. Maingon nga ang kuwarta gikan sa lokal nga panudlanan dili na ikapalit og mga materyal nga gikinahanglan sa atong kabarangayan kon walay tawo usab ang nag-initiate niana. So, puwedeng angkunon, puwedeng dili.

Ang importante sa mga lungsuranon kinsa kaninyo ang dagha'g proyekto nga nahimo sulod sa inyong termino. Hinuon kining tanan maoy pagatawgon og "strickly for politics only".

Paminawa ang "KONTRA BALANSE" sa DXKT, 1071 sa dial sa inyong mga radyo. Alas 7-8 sa buntag, gikan Lunes hangtud Sabado. Ug ang "KONEKSYON" matag Biyernes sa alas 7-8 sa buntag.